SAC ralkap in inn par ihsin Mipakhat tul tla that

SAC ralkap cu a hraang zawngih cangvailo dingin leitlun ram tamzetin thuron an pe nan tuisun tiangah an mah keelte an si thotho.

Zohmanih fial hran loin tu thlasung raldo kan cawl ding tiih thuthannak an nei hnu khalah Tlangpar hriamkeng ralkapbu ṭhenkhat an kap ringring thotho ih an mah keelten an cangvai rero.

Tuisun, May 9 khalah Yangon ramṭhen, Thanlyin myone, Star City ih inn number B5 cu a hraang zawngin an luhhnawh ih mipakhat a tlantum ruangah inn par ihsin an tul tla that tiah kiangkap um pawl in an sim.

Star City ih um mino pakhat cun “Sun nazi 2 hrawngah mawṭaw tamzet thawn ralkap pawl an ra thleng. B5 innpi an luhhnawh ih reilo te ah innpar ihsin mipakhat a tla that.”

“Thuhla kan sut ciang tikah ralkap kaihkhih phangin a tlan tum ruangah innpar ihsin an tul tla that tiah in sim. Ralkap pawl cun minung 14 an hruai ih an zaten khua hmu theilo dingin an mit an ṭawn sak. An thilri pawl khal an la cih” tiah KTM hnen ah a sim.

SAC ralkap pawl cu mipi soisathat an hmang tlun ah netalam cun langhngan rorin mi thil an fir ih, mi inn siim tikih thilri an mamawh lomi cu an siat sak ta ṭheu a si.

Leave a Reply

Your email address will not be published. Required fields are marked *