SAC ralkap in Hlasakthiam PoPo le Lemcang hminthang Zin Wine an kai

Kawlram lemcangthiam hminthang Zin Wine le hlasakthiam hminthang PoPo cu April 15 ah SAC ralkap in an kai thu theih a si.

Zin Wine cu a fapa Min Maw Kuain, R Za Ni, Lu Min te telin SAC ralkap in February 18 ah pukmah 505 orh terin thubuai an rak tuah sak. Cumi lak ah miṭhen cu kaihkhih an si zo ih, a nih khal tuisun April 15 ah kaihkhih a si zo thu a fapa Kyi Tha Hte in Facebook ah a tarlang.

Anih hi February 1 ih rampi cozah thuneihnak latu SAC ralkap dodal cangvaih nakih tel ṭheu a si ih duhphorhnak neitu mipi le ralkap/palik karlak buainak a um lai tivek ah kaihkhih tuar mal dingin le khawngaw hliamhma tuar tivek um lo dingin remdaihnak rak tuah ṭheutu a si.

Hlasak thiam PoPo khal tuisun, April 15 zaanlam nazi 3 hrawng ah a umnak inn ah SAC ralkap in an kai thu a manager in Facebook ah a tarlang.

Anih khal April thla thok lam ah SAC ralkap in pukmah 505 orh terin thubuai an tuah sak mi a si.

SAC ralkap in rampi cozah thuneihnak an la hnu ah langsar zetin ralkap ukhruai dodalnak ah a tel ve ṭheu ih bulpak khalin a phunphun in duhphorhnak nei ṭheutu a si.

Leave a Reply

Your email address will not be published. Required fields are marked *