SAC Ralkap ciimit dingin Raldo zir rerotu GenZ

Bawngbi dum le angki dum hruk mino 100 hrawng, thatho zetin zingpit ih training nei rero lai video tawi cu kan dung zarh hrawng ah oneline ah a suak ih a lar zet.

Mitamsawn cu GenZ ti`h kohmi kum 20 kiangkap mino an si ih, video tawi cu April thlathok lam, Kayin ram hmun pakhat ih zukmi a si tiah Reuter in a ngan.

An lakih hruaitu pakhat a simi MonMon cun Reuter hnen ah “hih hmun ah thla 3 sung raldo kan zir ding. United Defense Force timi pawlkom din kan tum. Hmuitinmi cu ralkap ukhruinak hnukthlak hi a si” a ti.

Mino tamzet cu tlangpar hriamhreikai pawlkom umnak hmun pan in raldo an zir. Miṭhen cu suahsemnak khuate pan in beunak an hawl ih miṭhen an si le ramri ah beu in cangvaihnak an nei rero.

GenZ ṭanpi dingin Myanmar-Thailand ramri ih thlengve GenX upa pakhat cun “hmun hla in ramri pan ih raldo zir le meithal hawl ih vaktawi mino hi amalbik thawngteel an kim ding” a ti.

Ralkap in kumpi cozah thuneihnak an la hnu February 1 in Myanmar ram a buai thok ih thlacem lam hrawngah boruak a sosang vivo.

SAC ralkap pawl cu hriamhrei ralthuam rinsan in an puarthau vivo ih March 27 lawng hman ah mawhneilo mipi 100 luan an kap that. AAPP ih ngankhum mivek asile April thlacem tiangah SAC ralkap kut tuar ih thi mipi 1000 an kim zik thlang.

Lamzawh nakah siseh, inn sung um men tiang an kap ih nauhak upa ti umloin an lungtho caan ah mi an kap that hluahhlo tikah mipi lam cun an mah humhimtuding ralkap dingsuak ding an beisei zet thlang.

KNU ṭuanvonei mipakhat cun “hriamhrei kengin hmainorṭul dinhmun kan thleng zo. Phun, Hnamdang ti umloin tithei dandan suah ih hmainor tlang ding kan hmabak” a ti.

Leave a Reply

Your email address will not be published. Required fields are marked *