SAC ralhraang UN ih hrolhawk tum ve cu an hlawhsam neknek

SAC ralhraang in Myanmar kumpi cozah thuneihnak an la hnu, May thla thok lam ah rampi aiawhtuding UN palai ṭuan dingah ralbawihlun Aung Thurein in ṭuanvo a la ding tiah UN hnen ah ca an kuat nan UN lam in tuini tiang letsaalnak an nei hrih lo.

SAC ralhraang ṭuanvonei Foreign Minister Wunna Maung Lwin in U.N. Secretary-General Antonio Guterres hnen ih ca a kuat mi copy cu Associated Press hnen ah a thleng ve ih AP cun July 20 ah internet cahmai ah a pholang saalmi a si.

Cakuat ahcun atufang official U.N. ambassador Kyaw Moe Tun cu a thuneihnak hmangsual in Kawlram cozah riangri a do ruangah February 27 ah hna an ban zo thu le UN palai thar ṭuan dingin ralbawihlun Aung Thurein ṭuanvo an pe zo thu tipawl an ngan.

Asinan, SAC ralhraang in Kyaw Moe Tun an hnong tum mi thu thawn pehpar in tunitiang UN in hmalaknak a nei hrih lo tiah theih a si ih UN ṭuanvonei pakhat cun “cawp le cilh in thu ṭhawn dualdo theih cii a si lo ih UN member ram pawl ih cohlannak a ṭul.”

“Atuih an dilmi thu cu tukum hrangih ruatremmi UN sungtel committee ram 9 (Cameroon, China, Iceland, Papua New Guinea, Russia, Trinidad and Tobago, Tanzania, United States le Uruguay) member pawl in rel hmasa ding a si ih, tutiangah meeting an to timi thu a um hrih lo. Meeting nei dingin caankhiah tuahmi tivek khal a um hrih lo” a ti.

SAC ralhraang cun rampi thuneihnak an la hnu ah Myanmar cozah dik ih pom dingin cangvainak phunphun thawn leitlun mipi an lem rero nan tuni tiangah Leitlun huap in Myanmar cozah dik ih cohlangtu cu ram hnihkhat lawng an um a si.

Leave a Reply

Your email address will not be published. Required fields are marked *