SAC ralhraang Thuthup a puut suak leh ta

Dothlengnak thawn pehpar ruangah siseh cupawl thawn pehtliahnak nei ruangih kaihkhih tuar nan, Thawngthlak ding khawp ih thubuai nei lo in thlah zalen cih dingmi mi ṭhenkhat cu an sung le pawl hnen ah SAC ralhraang in paisa an dil ih paisa pek veten thlah lok ding vekin bum tuartu an tam.

Kawlram a buai hnu, kiahkhih tuar pawl cu palikzung ah maw, SAC ralhraang kut sungah thusutnak an nei ta ih Thawngthlak ding khawp ih buainak neilotu an si cun thlah sal dingin thu an rel cat sak ṭheu.

Cuvek thuhla rak theitu pawl cun an umnak veng lal lole vengsung cozah ṭuanvonei tivek hnen ah pehtlaihnak nei in an sung le pawl hnen ah paisa an dil ter ṭheu.

Cumi thuthup cu Ralhraang sungthu theiciangtu mipakhat in Irrawaddy hnen ah a sim mi a si ih, “veng sung palik pehtlaihnak an nei ih palik cun veng lal lole vengsung ih cozah ṭuanvonei tivek hnen ah paisa dil dingin an fial sawng bet ṭheu.”

“Kaihkhih tuar sungte hnen ah cuzat paisa nan pe cun thlah zalen an si ding. Khazat nan pe le luat thei dingin an lo tawlrel sak ding ti`n an va sim thei. Atak cun paisa an pek lo khalle thlah zalen dingmi an si. Cumi an theilo ruangah sungkhat unau pawl cun neilo cingin an unau, an fa, an sungkhat luat thei dingin paisa an tawlrel ṭheu” a ti.

Cuvek bumnak tongtu cu Yangon, Mandalay le Naypyidaw ah an tam ih mipakhat hrangah kyat ting 5 in ting 30 hrawng an ngen ṭheu. Paisa dil dingin a tawlrel thoktu cu palik le SAC ralhraang pawl an si.

“Paisa an dil dan cu biakremaw dan ih zir a si. Kan dung June 23 ih an thlah mi nupinu pakhat cu kyat ting 30 an dil. Cuzatzat paisa kan nei lo an ti ruangah ting 15 ah an ṭhum ih a neetnak ahcun kyat ting 7 in an biak remaw. Cumicu venglal pehtlaih hmasa in an dil termi a si” tiah hminthup mipakhat cun Irrawaddy hnen ah a sim ih “Veng lal pawl in an rak eiruk sawng khal a si thei” a ti.

An kai nak san cu a pasal in CRPH hnen ah paisa a rak hlu dah ruangah a si ih thusut zirzoinak an nei hnu ah “sual nak a nei lo” ti`n thu an rel cat sak zomi a si.

“Anihcu naing-ngan-zii tuahtu khal a si lo ih thubuai tuah sak ding khawp in mawhnak a nei lo. A pasal in CRPH bomnak paisa a rak thawh dah ruangah an nupa in ralhraang pawl an kai. Amah cu an thlah sal zo nan a pasal cu thubuai an tuah sak” tiah amah cun a sim bet hrih.

SAC ralhraang duh lo zawng tuah ruangih kaihkhih tuar pawl lak khalah nawhthuh pek ih thlah zalen salmi an um. Kawlram mihminthang kaihkhih tuar pawl lak khalah paisa pek ih khulawtu an um.

“Cuvek pawl cun ယုန်လေး hnen ah bawmnak an dil tlangpi. ယုန်လေး in Yangon ih SAC ralhraang zung a biak sak hai ih amah bawmnak thawn thlah zalen salmi khal an um.”

“Atlangpin, mawhnak nei lo pawl kha paisa laklut nakah an hmang. Curuangah SAC ralhraang huatzawng tuahlotu cun paisa cemliam in buaipiding a si lo. Thusutnak an nei dingih mawhnak an nei lo cun an thlah cih mei ding. Simduhsan cu hilam pawl in thubuai tuah tlak lo an timi lakah thlah zalen salmi an nei” tiah SAC ralhraang thawn naivaitu hminthup mipakhat in a rel.

AAPP ih tarlangmi vek a si le SAC ralhraang lal hnu ah kaihkhih tuar mipum 6500 luan an um ih SAC Ralhraang kut tuar in nunnak liamzotu mipum 894 an um zo a si.

 

Leave a Reply

Your email address will not be published. Required fields are marked *