SAC ralhraang mi hrem dan rapthlak cu kum 17 pate in a relsuak thluh

Hngawngri tiang lei sungah phum tuar in rapthlak zetih SAC ralhraang hremtuartu kum 17 pate cun ralhraang kut sung ih a um lai an hrem dan hmuahhmuah cu HRW (Human Rights Watch) hnen ah a rel suak thluh ih cuih thu cu HRW in leitlun mipi hmai ah a pholang thluh.

Amahcu May thla thok hrawngah inn luhcilh tuarin SAC ralhraang ih kaihkhih tuarmi a si ih lamzawh duhphorhnak ih hruaitu pakhat sivekih puh tuar mi a si.

Tlangval pate cun “in kai lai ah meithal tawkawng thawn ka lu in sut ih ka mit in hup sak hnu ah ka theih dahlonak hmun ah in hruai.”

“In kaih hnu ni 4 sung thusutnak in nei lai ah cement thunmi ruafung thawn nasaten in thawi ih ka Ngal khal in rial sak”.

“Nithumnak ahcun in hremnak hmun ihsin nazikhuai hrawng fehṭulnak hmun ah in hruai. Puan thawn ka mit in hup ih ka kut an ṭawn hnu ah khur sungah in zau ter. Phaihlai thawn ka lu ah in vuak tum lawk. Khur laih pekte cu nung cingin inphumtum si hi tiah ka ruat lawk”.

“In khumnak hmun ah kaih tuar midang khal an um ih ei-inding tirawl in pe lo ruangah nung ṭawkṭawk thei dingin ek-inn tidai kan in. Thusutphah hremphah in ni 7 sung inkhum hnu ah Insein thawnginn ah in kuat. Anetnak ahcun thutiam hminkhennak in nei terih thawnginn ihsin in thlah sal” tiah a ti.

Mino tleirawlpa` simmi cu hremtuar dang pawl ih rak sim dahmi pawl thawn abangaw ruangah HRW cun thutak ah pom in Leitlun mipi hmai ah mihring pianvo ziang siar lotu SAC ralhraang sualraldan pawl cu an pholang thluh.

HRW pawlkom hin thirpum thawn vuakthawi tuar in a serh sung tiang thirpum sit lut tuartu nunau pakhat thu khal an rak phuang dah. Cuih nunau cu SAC ralhraang hrem nakah ṭhiṭha khalin a feh thei nawn lo tiah an tarlang

Human Rights Watch pawlkom hin atufang Myanmar ram buainak thu hi nasaten an ngaih ven ih, hmailam tikcucaan khalah mipi duhdah zetih soisatu SAC ralhraang cetcangdan thlir ringring in a ṭuldan vekin hmalaknak an nei tum vivo a si.

Leave a Reply

Your email address will not be published. Required fields are marked *