SAC ralhraang lakah a lo hum theitu Android App

Tulai cu SAC ralhraang khal technology hmang ṭangkai in mikainak hrang tiang an hmang thiam thlang ih mipi hrang ahcun hupphurh um zet.

Mi phone check lawng duh tawk loin delete zo mi zuk tiang an phorh sal thiam ih, cuvek ruangih kaihkhih tuar khal an tam vivo.

June 14 ih Sein Shwe Kone Tlawnginn kang ṭum ah minung 40 lenglo an kai ih thu phunphun sut in nasaten an hrem.

Cupawl lakah thlah salmi khal an um nan mi ṭhenkhat cu an phone sung zuk retmi ruangah voihnih kai ih kaih tuar khal an um.

Naupai pakhat phei cu ralhraang pawl ih hremnak ah a nau a siat phah. Amah cu an hrem hnu ah thlah sal a si nan a phone sung an zoh sak tikah Lamzawh duhphorh lai zuk tivek a um ruangah an kai sal mi a si.

Khuami pakhat cun “ceet (computer) thawn a phone an check sak cu delete zomi zuk pawl a suak thluh sal. Cumiah lamzawh duhphorh lai zuk pawl a tel cih ih zuk sungih langtu mino pawl umnak addresses an sut ih a sim theilo tikah natukin an thawi ih a nau pai mi a siat phah” a ti.

Hlo verver koin Phone sung ih zuk pawl ziangtin kan delete ding?

Kan phone sungah Dothleng cangvaihnak thawn pehparmi zuk, ca tvk retlotu cu kan mal ding. Boruak se vivo in delete zotu khal kan um ding nan ralhraang pawl in delete zomi zuk pawl an phorh sal thiam tikah ziangtiklai khalah buainak tong thei kan si.

Asile, kan phone sungih delete zo mi zuk pawl ziangtin kan hloter thei ding?

Hlo verver ko delete dan phun tampi a um ih cumi lakah a olbik pakhat cu App hman hi a si.

Miṭhen cun phone Factory reset tuah hnu ah a hlo verver thluh an ti. Cumicu thudiklo a si. Factory reset tuah hnu khalah zuk le ca ṭhenkhat cu olsamten phorh suak a theih lai.

Android app iShredder, Shreddit le Data Eraser cb tvk an hmang tlangpi ih cumi app cun phone sungih delete zomi data umnak hmunlawng pawl a hnawt fai thluh ding. (a thuahthuah rorin hmunlawng pawl hnawt fai ding a si tikah a kholh fai sung a rei zet ding. Na kholh hlan ah amalbik phone bettery 80% tal thun ta aw)

Ziangtin Data Eraser cb kan hmang ding?

Na download hnu ah home screen ih Freespace kha hmet aw la File access le contact access “allow” na ti hnu ah Internal Storage kha hmet aw. (Complete erase timi hmet pang hlah) Ziangtluk a hnawt fai ding timi a lang ding.

Continue hmet aw la hril ding “Method” 5 a lang ding. NATO Standard lole BSU TL-0342 timi kha hmet aw. (Hnawt fai dan sangbik a si ih rounds 7-8 rori a hnawt ding tikah tikcucaan a rei zet ding)

Thil thupi tuahnak a si vekin limit umloin na hnawt fai duh cun paisa pek a ṭul. Free version cun nikhat ah 100MB lawng a hlon thei.

App na lak duh le an hmin pawl ah hmet : iShredder, Shreddit, Data Eraser

Hminsin : Mai umnak ram zirin le phone hmanmi zirin App hman dan le a hnaṭuan dan a danglam thei.

“iShredder Android” hmandan

Leave a Reply

Your email address will not be published. Required fields are marked *