SAC ralhraang in Vanzam thawn ramsung khualtlawng sukso pawl hrangah Daan thar a tuah

Vanzam thawn ramsung khualtlawng sukso nakah hmatpungtin (မှတ်ပုံတင်) a hmuh theitu pawl lawng to sian an si thlang ding thu theih a si.

Ministry of Immigration zung thu suak vekin cuih Daan thar cu April 1 ihsin hman thok a si ding tiah ramsung vanzam thawn pehparmi zung lam ihsin thu an suah a si.

Tuhlan ahcun vanzam thawn ramsung khualtlawng sukso duhtu Kawlrammi pawl cun remcanlonak ruangah မှတ်ပုံတင် aiawh in zunglam caken siseh, Tlawngta id, driving license le theihpitnak caken dangdang hmangin vanzam thawn ramsung hmun dangdang ah khual an tlawng thei.

Asinan, April 1 ihsin thok, Daan thar an suah vekin မှတ်ပုံတင် nei lo pawl cu ziangti hmanin ramsung khualtlawng sukso nakah Vanzam an to thei lo ding tiah Airline ih hnaṭuan pawl in News-Eleven hnen ah an sim a si.

SAC ralhraang in 2022, April 1 ihsin thok, ramsung khualtlawng sukso nakih kendingmi id ah hmatpungtin lawng an pom thlang ding thu tlangthannak an nei zo ih, hmatpungtin nei hrih lo pawl zamrang theitawk ih tuah lohli dingin mipi an sim thei.

Siarbet : SAC ralhraang in Hmatpungtin tuah lohli dingin Mipi a nor nak san

SAC ralhraang in Hmatpungtin tuah lohli dingin Mipi a nor nak san

Siarbet :  SAC ralhraang in 2022, April 1 ihsin thok, ramsung khualtlawng sukso nakah hmatpungtin lawng an pom thlang ding thu tlangthannak an nei.

Tuhlan ahcu khualtlawng sukso tikih kenmi id aiawhin theihpitnak caken (ထောက်ခံစာ) tivek an rak hmang thei nan, April 1 ihsin thok check gate/point ah siseh, khual thlennak riahbuuk tivek ah hmatpungtin lawng hmang thlang dingin thu an suah a si.

Hih thu thawn pehpar in NUG sungtel ṭuanvonei mipakhat cun hitin a rel. “Dothlengnak tha a cak vivo ih an thlaphang a zual ruangah a si. Mipi lamṭang hriamkai pawl olsam zetih kaihkhih an si thei nak dingah hmatpungtin tuah lohli dingin rampumhuap rorin an nor hrim mi a si.”

“Cun, Ṭhalpi hrawngah rampumhuap in hmunram thianfai an tum tivek thu a suak ih, cuih boruak ah khawi hman feh thei hlah hai seh ti`n mipi ṭhih nakah an hmang cih bet. A ol zawngin kan rel a si le ‘an mah dodaltu pawl pangaiten cangvai thei hlah hai seh ti an duh ruangah a si.”

“Atu rampi boruak kan thlir a si le khualtlawng sukso mipi hmuh ding an mal vivo. Cuvek boruak ah ram mi sinak id neilo pawl olsam zetih hmuhsuah an beisei” tiah amahcun a ti.

Tudinhmun ah SAC ralhraang kuthnuai ih um Ministry of Labour, Immigration and Population zung ṭhenkhat cu lenglam ah vaksuak in hmatpungtin mi an tuah sak tiah theih a si ih, Ralhraang thusuah mi khalah “a ṭul ahcun innkhat hnu innkhat lutsuak in an vak vivo ding” tiah an tarlang a si.

Khawlai lakah ralhraang milai thah tuar an tam zet lai ah tuvekin khawlak rori ah an cangvaih vutvo ngam cu ralhraang in hmatpungtin thawn pehpar in thuhlapi tumtah a nei timi cu ciang zetin a lang a si.

Ramsungum Kum 16 kim cin cu hmatpungtin tuah tengteng ding ti a si ih id Lem hmangtu le id hleifuan neitu cu cozah daan vekin thubuai tuahsak an si ding tiah SAC ralhraang ih thusuahmi ah an ngan tel a si. (SN 030215J)

Leave a Reply

Your email address will not be published. Required fields are marked *