SAC ralhraang in Tlangparmi humreek nakih a hman bikmi Tawhfung

Singapore ih PetroChina International Singapore Pte Ltd company in SAC ralhraang hnen ah April thla lam ah Vanzam sii (Jet fuel) a zorh thu zirzoinak neitu Reuters in a tarlang.

Cumicu SAC ralkap an lal hnu, Myanmar ram ah ramdang ta vanzam sii phurlut hmaisabik ṭum a si ih April thlalai lam ah journalist Mratt Kyaw Thu khalin a rak pholang dah.

PetroChina cu China National Petroleum Corporation ta a siih, SAC ralhraang hnen ih zorhmi Vanzam sii hmangin Daan pahbal in tlangpar hriamhrei keng ralkapbu kahnak ah an hmang ding ti thei cingin hitiih an zorh thotho cu boruak thlirtu hrang ah thuruat ding tamzet a suak ter phah thluh. (Midat khua tlun ih zammi helicopter le Fighter khalin himi Vanzam sii an hmang lo ding ti sim a theih lo)

Asancu, SAC ralhraang in Myanmar kumpi cozah thuneihnak an la lai ah China cozah in dunglam in a bawm thup ti`n thu a um ih, an mah China cozah inle zianghman kan theihpi lo an ti tikah thuruatding tamzet a suak termi a si.

Mipi theih dingih pholang lomi ramsung thil lutsuak cazin ah “PetroChina International in Jet vanzam sii 13,300 tonnes le datsi 4,000 tonnes cu MT Yu Dong Lawngpi hmangin April 15 ah Thilawa Port (သီလဝါ ဆိပ်ကမ်း) ah a phurlut tiih ngankhummi a um” tiah Reuters in a tarlang.

US le British telin nitlaknaklam ram tamzet cun SAC ralhraang cetcangdan soisel in pursum lam khal an phit sak. Nan, Tlangpar hriamhreikeng ralkapbu le mipi umnak bomb thlaktu Vanzam/helicopter pawl ih hmanmi Petroleum products (ရေနံထွက် ပစ္စည်း) cu an phit tello.

ASEAN khalin Myanmar ah remdaihnak um thei dingin hmaton thureltlangnak an nei nan SAC ralhraang hrangih thupibik pursum lam phit ding thu an rel tello.

Vanzam sii (Jet Fuel) thupit zia

SAC ralhraang hrangah hmunhla pehtlaih awknak hrangih thil thupibik pakhat cu Vanzam sii hi a si.

Myanmar ram ah hin Vanzam sii lakluttu company pakhat lawng a um. Cumicu Puma Energy a si ih, SAC ralhraang in rampi ukhruai thuneihnak an la hnu February 10 ah Puma Energy cun a hnaṭuan cawlh a tum lawk thu a phuang.

Cuveten, SAC ralhraang cun Puma Energy fingkhawimi Vanzam sii khawlnak Thilawa Port (သီလဝါ ဆိပ်ကမ်း) cu February 12 ah an la cih. Hitiih an cangvaih lohlimi hin an hrangah Vanzam Sii a thupit zia a langter sinsin a si.

Tlangpar hriamkeng kaihfung ih an hman bikmi khal Vanzam sii hi a si. Vanzam thawn bomb va thlak hai lo seh la SAC ralhraang hrangah nehnak co a har tiah rampi boruak thlirtu miṭhenkhat in an rel.

Mindat doawknak kan zoh tik khalah SAC ralhraang in khuapi a la suak theinak cu Vanzam sii ruangah a si tisehla a sual tuk lo ding.

CDF Mindat ih ṭuanvonei mipakhat khalin Lei lam ih ra mi ralkap cu kan kham thei. Nan, helicopter leh vanzam thawn in ra heel cu kan Lung a vavai thluh. Cuhleiah tlun lam in inkap. Hmun hla in phukpi hmangin inkap nan cumi ruangah kam zaam lo. Nan, Vanzaam thawn in heel, Lamlakin an mawṭaw longin ralkap kan that tikah tlunlam in ralkap tamzet an phurlut. Cuti`n tuah lo hai sehla cu Mindat khuapi hi an la thei ding zum a um lo a ti.

Leave a Reply

Your email address will not be published. Required fields are marked *