SAC ralhraang in Thawngtla pawl an thlah tum nak san

SAC ralhraang in Thawngtla tamzet suah an tum tiah thuthang a suak cu atufang hitluk rambuai hnaṭuanding umlo laiah Covid nat le a karh vivo thawn ziang duh san ih tuah tummi si pei tiah thusut ding tamzet a um.

Mipi lam in ruah nak a phunphun a suak ih cumi lakah dothleng cangvaihnak ih hmuhtonmi tamzet neizotu mipakhat ih relmi kan run tarlang sawng a si.

Insein Thawnginn

SAC ralhraang tumtahmi le kan thei ṭulmi

SAC ralhraang cun daan loih kaihkhihmi Thawngtla tamzet thalh zalen in Dothleng cangvaihnak le mipi lakah thilung hmuaw thaimlo dingin a keellebawrten an cangvai tum thlang.

Thawngtlak thlah ding thu ah kan nih mipi lam in lungawi ding hran a um lo. Asan cu sual tuahlo, kiahphu lo kaih tuar pawl thlah zalen ding an si tikah kan nih lam in lawm nak ding san a um hran lo. An thlah zalen dingmi pawl khal an mah lam ih hupphurh deuhmi hruaitu le mipi kaihruai thiamtu, cangvaihnak ih pumpeaw theitu tvk cu an thlah loding ticu theih cia si ko.

Mipi lam in SAC ralhraang tumtahmi phen ih thil umdan kan ṭhlir thiam a poimawh zet. Leitlun mipi hmai ah mualpho in le ramsung buainak khalih tlaksiat lam panvivotu SAC ralhraang cun a tu ih thil a tuah dingmi cu Leitlun mipi hmai ah thiamfihlimaw tum in le ramsung Dothlengnak sungmuril ah ṭhenṭhekawknak tuahtum in ke a kar mi a si thei.

Curuangah kan nih Dothleng cangvaihnak ih teltu pawl hi kan ralring thiam a poimawh zet. Thawngtla suak ah kan ralkappi, kan uu kan nau kan rual ṭha an telve ding. Cumiah kan nih lam in ziangtin khuakhannak kan nei ding? Pehtlaihnak nei sal in hna kan ṭuanpi ding maw timi hi atu ihsin kan ronaw cia a ṭul.

Kan uu, kan nau, rualṭha le hnaṭuanpi cu an si nan ralhraang pawl ih hminsin zomi an si tihi kan theifiang a ṭul. SAC ralhraang in a umtlan cangvaihdan, zo thawn pehtlaihawknak an nei, zo thawn an biakaw tvk tiang thlingthla thup in dunglam in tumtahnak tumzet an nei thei.

Curuangah kan nih Dothleng cangvaihnak ih hmalaknak nei rerotu pawl in thawngtla suak kan hnaṭuanpi thawn pehtlaihawknak kan nei tikah …

1. An mah pehtlaihnak ah a hranten phone/number hmang ding

2. Kan sung thu ziangvek cin tiang kan theiter ding ….

3. Amalbik ni 14 in 30 karlak hrawng mipum rori`n tongaw loin zoh ṭha lawk ding tvk in hmailam ih kan ton theimi hrangah timlamnak kan rak nei cia a ṭul.

Atuih ka simmi cu kan lakah ṭhenṭheknak suak dingin le thawngtla suak pawl pehtlaih loding tiih ka simmi a si hrimhrim lo. 88 hnu, Khin Nyunt san lai ih thilthleng pawl theizotu kan si ih khai san lai ih an hmankeelte hmangin Dothlengnak dingder dingin thil an tuah thei timi theifiang dingin kan ralrinṭulzia ka run relmi a si.

Cuvek pawl theithiam in fimkhurten kan cangvai cun Dothlengnak kan hlawhtling hrimhrim ding a si. (NOD)

Leave a Reply

Your email address will not be published. Required fields are marked *