SAC ralhraang in Ralkaptlan mal ding ih a tawlrel dan thuthup puut darh

Defence Services Medical Academy (တပ်မတော်ဆေးတက္ကသိုလ်) ih Master of Medical Science hrang camibuai ongtu an tamtuk cu Myanmar mipi an mangbang thluh.

SAC ralhraang in kumpi cozah thuneihnak a la hlan ahcun MMedSc hrangah subject 20 luan camibuai tuah ṭheu a si ih a ongtu 100-150 hrawng lawng an um ṭheu.

Rampi a buai hnu ah MMedSc hrang ih camibuai an tuah cu a ongtu 300 luan an um. Cutiih camibuai tuahtu le ongtu an tam sutsi cu ralkap tlan mal dingin SAC ralhraang in a ong ter hrim haimi a si tiah Tatmadaw sunglam thu theitu mipakhat cun thuthang a puut darh ter.

Amahcun camibuai tuahtu cazin le ca thupi dangdang cu Journalist Mratt Kyaw Thu hnen ah a pholang thluh.

“Ahlan ahcun cathiam ngaingai pawl lawng in an ong thei. Nan, tukum cu mitamzet an ongter hrim. Asancu SAC ralhraang in ralkap tlan an tam tuk ding an phang. Ralram ih kuat tuar phangah camibuai tuah hrim khal an um ko” ti`n thuthang puut darh tertu cun a sim.

Camibuai ong pawl cu atu ah tlawng an kai zo ih raldo ṭul loin kum 3 sung tlawng an kai pehzom ding.

“Ahlan thawn tahkhin in atu ih camibuai ongtu cu zaṭek zawngin an tam tuk rori. An ong ter hrimmi a si. Abikin tlunlam ih buainak pawl control nakih an hmang hlei ah ralkap doctor pawl hrang lamzin an ong sak cu ralkap tlan mal dingin an control mi a si” tiah thuthup puut darh tertu cun a ti.

Leave a Reply

Your email address will not be published. Required fields are marked *