SAC ralhraang in hngirṭeu in khuate pakhat an urkang

Sagaing ramṭhen, Thlanglam Kalay myone ih um Yaeshin (ရေရှင်) khuate cu September 3 zaanlam ah SAC ralhraang in an luhcilh ih thilri phunphun an siat sak hlei ah zaan thim hnu ah inn an urkang sak tiah theih a si.

Ralhraang luhcilh tuar Yaeshin khuami ṭhenkhat cu hmunhim ah beunak an hawl ih an khua innkang cu hmunhla in mithlicanghnap thawn an cuan.

Inn ziangzat an khang timi cu theih fel a si lo nan Yaeshin khua an urkang mi tiih tarlangmi video tawi cu online ah a darh.

Meisa hlio meikhua suak zuk phahtu nunau pakhat cun “SAC ralhraang pawl luhcilh mi Yaeshin (ရေရှင်) cu a kang rero. Khuami ziangzat an tang timi khal kan thei lo. Hmunhla ihsin cuan baaklo cu ti theih dang kan nei lo” tiah ṭap phah, video zuk phah in a rel.

Hitiih khua an urkang nak san cu tuizing Kalay PDF thawn an kapaw nakih an tuar na ruangah hngirṭeu in an urkang a si ti`n ramsung rintlak media ṭhenkhat cun an tarlang.

Kalay PDF khalin tuizing ih kahdonak a suak thu cu nemhngetnak an nei ih doawknak ah an lam mipahnih in natuklo hriam an tuar thu le ralhraang lam an tuar na nan hliamtuar le mithi um zat theih a si lo thu, khuatlang mipi theihternak an nei.

Leave a Reply

Your email address will not be published. Required fields are marked *