SAC Ralhraang ih Fake News phuang mi cu mualphothlak zetin a lang suak thluh

June 22 ih Mandalay PDF le SAC ralhraang kapaw lai ah mawṭaw pakhat cun ziinkap ih transformer pah ngah in a totu mino 4 an thi tiah thuthang a suak.

Cuih mino 4 cu Mandalay PDF sungtel sivekin Ralhraang pawl in thu an suah nan vanduainak tongtu mithi tei` sungkhat pawl cun Mandalay PDF thawn pehtlaihawknak neitu an si lo tiah an sim ve.

SAC ralhraang thusuahmi ah “June 22 zinglam doawknak ah mi 8 cu nung dam in kan kai. PDF mino 4 kahthat an si ih, Lamziinpi ah mawṭaw thawn mi kap phahtu mino 4 cu ziinkap ih transformer pahngah in a hmun rori ah an thi cih” ti`n an tarlang ih, cupawlcu PDF sungtel sivekin an pho lang.

Asinan, thuthang felfai a suak cu ralhraang pawl ih Fake News cu mualpho thlak zetin a lang suak thluh.

Mino 4 cu Sintgaing myo, Ar zuat hmuan ih feh tum an si ih ralhraang pawl ih dawi tuarin vanduainak an tong sawn hi a si.

Mithitui` sungkhat naivai pakhat cun “an 4 in PDF thawn pehtlaihawknak an nei lo. Vansiatthlak zetin kahdonak a suak lai an va tong pang ih dung an kir lai ah ralhraang pawl ih dawi an tuar sawn mi a si.”

“An ruak pawl le ralhraang siizung ah an ret tikah tutiang kan hlam ngam hrih lo. Lak theih danding ngaihtuah in kan hngak rero si ko” a ti.

Mithi 4 cu မိုင်းနိုင်လိုင်, မိုင်းနိုင်ထွန်းကြည်, မိုင်းချစ်ဆွေ le ကိုအားတီ te pawl an si ih Shan ramkulh, Thibaw le Namhkan khuami an si.

June 22, Mandalay ramṭhen, Chanmyathazi doawknak ah Mandalay PDF sungtel 2 le PDF bawmtu DRPA (အာဏာရှင်တော်လှန်ရေးပြည်သူ့တပ်မတော်) ihsin mi 3 an thi. Kaihkhih tuar PDF mino 6 an um tiah theih a si ih, ralhraang lam khalah thi le hriam tuar an um nan Mandalay PDF in official in an phuang hrih lo.

Siarbet : Mandalay Doawknak an ṭan thok dan thuhla cipciar

Mandalay : June 22 ih SAC ralhraang le Mandalay PDF doawknak ah mipi lam in mithi an um vekin ralhraang lam khalah ralbawi pahnih telin miṭhenkhat an thi.

“Ralhraang bawi pahnih (ဗိုလ်ကြီး le ဒုဗိုလ်မှူးကြီး) cu an thi ciangih kan lam khalah hriam tuar, kaihkhih tuar le ram hrang nunnak hlantu an um ve” tiah PDF ṭuanvonei mipakhat in a ti.

Doawk an ṭan hnu nazi kaar hrawngah SAC ralhraang khalin kahdonak ah hriam tuar ralkap an um thu an phaung nan an dinhmun cu cipciar in an tarlang duh lo.

Cumi thusuahnak ah “Mandalay myo lamziin 54 le 111 Lamkiil ih inn check an tum lai ah PDF thawn kahawknak a suak ih mipali thi in, mipariat cu nungdam in kan kai. Culodang mithi 4 cu mawṭaw thawn tlan tum in ziinkap ih tranformer an pah ngah ruangah an pali in an thi” tiah SAC ralhraang pawl cun thusuahnak an nei.

Asinan, ralhraang thusuahmi cu thuthang diklo (nemhnget theih lo) a si tiah Mandalay PDF ṭuanvonei ဗိုလ်ထွန်းတောက်နိုင် in a rel ih “kan lam ah mi 2 an thi. Kaihkhih tuar 6 an um. Cun, in bawmtu DRPA (အာဏာရှင်တော်လှန်ရေးပြည်သူ့တပ်မတော်) lam in mi 3 an thi” a ti.

Doawknak a ṭan thok dan thu ah ဗိုလ်ထွန်းတောက်နိုင် cun “mizaan lam ah Chanmyathazi myone ah bomb a puak. Cumi ah Ralhraang pakhat a thi cu tuar na in inn khat hnu inn khat an lut ih mi an check vivo.”

“Kan nih cun check ding kan duhlo hlei ah check ter thei dinhmun kan si lo. Cutin boruak a sosang thok” a ti.

SAC ralhraang cun palik mawṭaw 20 lenglo thawn thazaang dang an cah bet hnu ah PDF pawl umnak inn luhcilh in kapawknak a thok cih.

“Thil cang dan a rang tukih hrial theih dan lamziin umloin innsung ah an reekbet ih innpi an kulh thuh. SAC ralhraang pawl an thleng hnu lawngah thuthang kan ngah tikah a rak tlaituk zo. Innsung ih um pawl run thei dan ding a um lo. Kan lut ve cun kan zaten thi thluh thei dinhmun kan si ruangah kan unau pawl cu kan run thei lo” tiah ဗိုလ်ထွန်းတောက်နိုင် cun a ti.

Kahdonak an cawl hnu ah khuasung hmun tamzet ah mei urkang mi le bomb puak thawmvang theih ding a tam ih ralhraang pawl khal hmuntin ah ṭhekdarhaw in an duty.

Ralhraang pawl cu zaanlam hnu khalah khuasung lutsuaknak hmun pawl kil in mi innsung tiang luhhnawh in cangvainak an nei tiah Myanmar Now in a ngan.

Leave a Reply

Your email address will not be published. Required fields are marked *