SAC Ralhraang ih “Digital currency” tuah tum ve thu ah Mithiam pawl Annka

Rampi cozah tiawtu, mipi hnonmi SAC ralhraang cun tlaksiatlam a pan cuahco mi rampi tungdingsaal dingin santhar paisa, tham theih lo “digital currency” tuah thei an beisei.

Digital tangka cun ramsung paisa luansuksodan a ti danglam an beisei ih, a tuah dan ding belte an fiangfai lo.

“A ṭha zawngin ramsung paisa hman dan tampi a ti danglam ding. Amahbelte local company thawn kopaw in maw, kan mah cozah lawng in kan tuah ding ti cu kan ciang hrih lo. Fiangten rel cun thuthluknak kan tuah hrih lo” ti`n SAC ralhraang aiawhin Zaw Min Tun in a rel.

SAC ralhraang hrangih tlangautu Zaw min Tun cun duh tik caan ih tuah thei men vekin a rel nan, Kawlram hrang paisa tamzet rak puuktu World Bank ih ṭuanvonei Kim Edwards cun a letling in a rel.

“Digital currency tuah ding cu thil olai a si lo. Rampi pakhat hrangih tuah ding a si tikah a hngetmi le rintlak duundaan tampi tuah a ṭul.”

“September 2021 ih a tawp zomi kumpi budget kan thlir tikah ramsung pursum tuahnak cu zaṭek 18% rori a tlaniam. Hmailam hrang kan ruah dan ah zaṭek 1% baaklo pursum tuahnak a ṭhang lo ding ti`n kan hmu. Curuangah “Digital currency” tuah thei dinhmun an si lo ti`n kan hmu” tiah Kim Edwards cun a rel.

Central Bank of Myanmar ih director-general Win Myint khalin thil olai a si lo thu a rel ih “tu dinhmun ah digital currency thu kan zir rero. Aṭhatlam siseh, a siatlam khal kan thei ciang a ṭul” a ti.

Atufang Kawlram dinhmun cu siat lam a pan vivo ih, pulhnat boruak umloin Min Aung Hlaing in ukhruainak rak lak lo bet seh la tuhlan hnakin pursum tuahnak zaṭek 30% hrawng a ṭhang ding tiah mithiam pawl in zumnak an nei a si.

Unau ah Kaiaw dingin Ralhraangbawi Min Aung Hlaing in PM Hun Sen hnen ah dilngen

Siarbet : Unau ah Kaiaw dingin Ralhraangbawi Min Aung Hlaing in PM Hun Sen hnen ah dilngen

Cambodia Prime Minister Hun Sen cu SAC ralhraang sawmnak thawngin January 7 ah Kawlram ah a ra tlawng.

Ni 2 caam dingin a ra ih, Naypyidaw a thlen hnu, Min Aung Hlaing thawn hmaton thureltlangnak an nei lai ah ralhraangbawi Min Aung Hlaing cun unua ah kaiaw dingin PM Hun Sen hnen ah a dilngen.

Cuih thu cu amah Hun Sen rori`n Cambodia hrambun Fresh News hnen ah a sim ih “senior general Min Aung Hlaing in a Godbrother dingih in dilngen cu ka tha tho zet” tiah a ti.

Cambodia PM Hun Sen cun “innsang tongawkhawmnak lole Ṭhitawknak puaipi tivek a um tikah khuallian dinhmun in sawm tengteng a beisei” tiah a rel bet a si.

Cambodia PM Hun Sen le ralhraangbawi Min Aung Hlang tongawknak cu leitlunhuap rampicang le human rights thawn pehpar ih hnaṭuan pawl in nasaten an soisel ih, ASEAN Human rights ṭuanvo neitu tla cun an pahnih hrang hlawk nak hrangah an tongaw mi a si ti`n an soisel ve a si.

Cambodia PM Hun Sen in Ralhraangbawi Min Aung Hlaing a phat san

Siarbet : Cambodia PM Hun Sen in Ralhraangbawi Min Aung Hlaing a phat san

Tuṭum, ASEAN hruaitu a simi Combodia ram cun January thla sung ih a ṭhulh zo mi annual ASEAN foreign ministers meeting cu Feb 16-17 ah tuah dingin a nemhnget.

Cuih meeting ah Cambodia Prime Minister Hun Sen cun SAC ralhraang a sawm tel tum lo tiah sunglam thuthang dongtu rintlak kyodonews cun a tarlang.

SAC ralhraang in ramsung a hraang zawng cangvaihnak a ti tawp cuanglo ruangah hitin thuthluknak a tuah ti a si ih, “ramsung remdaihnak hrang hmalaknak malte tal a um lo cun SAC ralhraang ai ah ramkhelnak thawn pehpar lotu sawm an si ding” tiah an tarlang.

PM Hun Sen thawn naivaitu miṭhenkhat cun SAC ralhraang in ASEAN thusuah a thlun lo ruangah meeting sawm tum lo mi sivekin an rel nan, Combodai ramsung buainak ruangih soiselnak a tam ruangah siseh, Indonesia le Malaysia hruaitu pawl in SAC ralhraang sawmtel an duh lo ruangah PM Hun Sen cun a hnaṭuanpi mithmai zohin le Leitlun mipi mithmai ngah duh ah hivekin thuthluknak a tuahmi a si tiah mithaim pawl cun an rel.

SAC ralhraang hin hnon a tuar nak ASEAN pawlkom ah lut kir saal thei dingin PM Hun Sen cu karbak ah a hmang tum.

Kawlram tlawng dingin SAC ralhraang in a hranten a sawm ih Min Aung Hlaing thawn sangkakhar meeting nak tiang an rak nei dah.

Asinan, atu ah, leitlun mipi mithmai zohin le a hnaṭuanpi pawl nornak zaar ah PM Hun Sen cun annual ASEAN foreign ministers meeting ah SAC ralhraang a sawm tel lo tiah theih a si nan, leh hnu ah a thu ṭhawn saal in meeting a sawm saal khal a si thei.

Leave a Reply

Your email address will not be published. Required fields are marked *