SAC ralhraang cun an lam ṭangdahtu pawl khal an Hlah cuang lo

Kalaymyo, Inyakung veng ih um USDP ṭantu U Win Zaw Oo te innsang cu June 19 ah SAC ralhraang in an siim ih mi 4 kap that in 2 kaih an tuar.

“Ziinpi meisavang ah ralhraang an si ti cu fiang zet in kan hmu. Inn hmai ah ṭongkahraang in an au ciamco hnu ah ra suak uh tiah an au. Mipakhat a ra suak cu an kap cih. Cuhnu ah Innsung ah luhcilh in meithal an hmet pauk bet” tiah veng sung um hminthup mipakhat in a ti.

Zaan nazi 8 luan hrawngah ralhraang thuamhnaw hruh mi 10 hrawngin an siim mi a si ih mipa pathum le nunau pakhat an kap that ih hriam tuar pahnih cu ralhraang siizung ah an kuat.

Ralhraang pawl ih kahthatmi U Win Zaw Oo te inn ah innsangnu, fapa 1, fanu 1 le Tu`pahnih telin mi 6 an um.

Vengsungum mipakhat cun “Inn hmai ih thawmvang ruangah innteekpa a suak cu an kap cih ih a hmun ah a tlu cih. Innsung ah lut in milengkhaan ih um an tupa kum 30 mi Ko ZawZaw an kap bet. Culaiah inntlun ihsi rungṭum innsangnu Daw SanSanMaw khal an kap ih inntlun ih um an fapa kum 23 mi Ko TiHahAung khal an kap that tiah an sim. Cuhnuah inn dunglam coka ihsin thinphang zetih tlansuaktu an fanu kum 26 mi le an Tunu khal an kap” tiah a ti.

Coka lam ih tlansuaktu mipahnih cu hriam tuar in ralhraang siizung ah an hruai tiah thuthang a suak ih culo bak cu an thuhla dang nemhngetmi a um lo.

“Miruak 4 cu a zaanzaan in an thiar cih. Meithal thawmvang a dai hnu ah ralhraang mawṭaw pakhat ra in an inn thilri voihnih thiar in an thiar. Nazi 8 luan hrawngin buainak a thok ih zaan 12 hrawngah boruak a dai sal” tiah khuami cun a sim hrih.

Khuami pawl ih sim dan ah kahthattuar U Zaw Win Oo te innsang hi 2020 rampi hrilawknak ah USDP ṭantu an si nan, rampi a buai thok hnu ah Lamzawhtu ṭanpi in, ralhraang le mipi kapaw lai khalah an inn mawṭaw taya tivek thawn Lamziin kham in an rak telve tiah an sim.

“Ziangruangah that an tuar ti cu kan thei lo. Langhngan rorin an inn thilri voihnih rori an ra thiar cu suamawknak phunkhat tla a bang” tiah khuami cun a hmuh dan a rel a si. (Mizzima)

Leave a Reply

Your email address will not be published. Required fields are marked *