RCSS in SAC ralhraang ukhruainak hnuai ah Federal rampi din thei beisei

SAC ralkap hotu Min Aung Hlaing in Tlangpar hriamkai pawlkom hruaitu pawl remdaihnak hrang thurel a sawmmi ah a cohlangtu pawlkom 10 an um ih, ralhraang sawmnak cohlangvetu RCSS (Restoration Council of Shan State) cun beiseinak tumzet thawn an cohlang mi a si thu, mipi an sim thei.

2022, May 12 nikhenmi RCSS thusuah cang 3 nakah
“mahte ukhruai theihnak famkim a si mi Federal rampi din theih a si lawngah mipi duhmi ukhruaiawknak cangsuak theiin danglamnak a um thei dingih remdaihnak thawn a khatmi ram cangkang kan din thei ding ti`n zumnak kan nei hnget” tiah an tarlang.

RCSS cun SAC ralhraang ukhruainak hnuai ah Federal rampi din theih a si ding ti`n cu thusuah ah an tarlang kher lo nan an thusuah cu Ralhraang thawn Federal rampi kan din ding ti thawn a bangaw ti`n ramsung mipi cun an hmu ih, hnihsuaksainak ah a hmangtu hmuh ding an tam.

An thusuah hnuai ah comment a tam zet ih mipakhat cun fuh zetin hitin a comment ve. “NUG hmanin Federal rampi hmin tar in Dothlenghnak a tuah nan, an thusuah pawl ah cuvek rim a nam lo.”

“Culaiah hrimhrei ralthuam rinsan ih mi nuaineek hmang SAC ralhraang hnen ihsin cuvek lamlam an beisei ngam cu ziangvek ruahnak an nei si pei” tiah a ti.

RCSS/SSA hin tu kum thok ah “tel ding cin pawlkom an sawm thluh lo cun SAC cozah thawn thureltlang kan tum lo” ti`n thu an rak suah dah nan, atu ah ziangruangah an thu an thleng saal ti cu felfaiin theih a si lo.

Ralhraangbawi Min Aung Hlaing in remdaihnak thurelding a sawmmi pawl ah DKBA (Democratic Karen Benevolent Army), KNU-NLA/PC (Karen National Union/Liberation Army – Peace Council), PNLO (Pa-Oo National Liberation Organization), NMSP (New Mon State Party), ALP (Arakan Liberation Party), RCSS (Restoration Shan State Council), LDU (Lahu Democratic Union) le (non-NCA) UWSA (United Wa State Army), NDAA (National Democratic Alliance Army – Manglar), SSPP (Shan State Progress Party) tipawl in an cohlang tiah theih a si.

Leave a Reply

Your email address will not be published. Required fields are marked *