Rapthlakza video le zuk phunphun telmi ralhraang ralkap phone thlau mi an sar

Sagaing ramṭhen, Ayadaw myone ah ralhraang ralkap phone thlau mi an sar ih, a sung ih um mi zuk le video pawl cu RFA (Radio Free Asia) Washington DC zungpi ah a thleng.

Phone sung ih mahte zukawmi video le zuk 144 a um mi sung ihsin a thupi deuh tiih ruah mi pawl cu tuzing, June 18 ah RFA in internet cahmai ah a pholang.

Zuk pawl ah mi an that mi rapthlakza zuk pawl siseh, mi an hrem lai le mi an kai mi zuk tivek a tel ih, zianghman siar tham lo zetin mi an that zat le an that dan tivek tiang an rel.

Phone thawn video zukaw phah in “ziangtin mi na that. 26 rori na that zo fawn ih ziang tin na that. Meithal thawn lawng maw na kap that” tiah mipakhat in a sut ih “Meithal thawn ka kap that mi tla an um. Nan, ka kut thawn rori cu ka that lo” tiah ralhraang ralkap pakhat in a sawn ih thusuttu cun “kei cu namte thawn tla an hngawng ka hlep” a ti.

Cuhnu ah ralhraang ralkap pakhat in mi hngawng a tan bul dan, phum ol dingin an Kut Ke pawl a tan dan a rel ih hni phah in an rel thaw zet.

A rualrual in mi an kai mi zuk pawl khal a tel ih cumi sung ihsin an that mi miruak zuk pawl khal a um.

Zuk le video pawl cu tubai April-May thla hrawng ta a si ih Sagaing ramsung ralhraang cangvaihnak hmun pawl ih zuk mi an si.

Hih thu thawn pehparin RFA in ralhraang thuphuangtu Zaw Min Tun thu an sut tikah “buainak hmunram pawl ah thuhla felfai kan sut tik lawngah kan lo sim thei ding. Thu kan sut lai” tiah a ti.

Himi video le zuk pawl hin ralhraang ralkap nunrongzia le mipi an ti duhdah zia atakin a langter ih heekawknak tivek tiang hmantheih dingmi thil thupi pakhat a si.

Leave a Reply

Your email address will not be published. Required fields are marked *