RALRING : CDM hrang hmalaknak nei ruangih buainak tongtu pawlkom an tam vivo

Rampi Cozah buanthluknak ih an rak hman hlawhtling zetmi “Civil Disobedience Movement” cangvaihnak cu ralkap uknak dodalnak khalah Myanmar mipi in hmual nei zetin an hmang vivo.

Cutiih a cak vivo mi CDM cangvaihnak cu Kawl ralkap in an hupphurh ṭan ruangah CDM cangvaihnak hrang ih hmalaknak neitu pawlkom ṭhenkhat cu an buaipi thok.

February 1 ih rampi cozah thuneihnak latu ralkap pawl cu February 10 hrawngin an cangvai nasa cuangih, atu khalah CDM cangvaihnak hrang ih mi bawmkhaitu 21 Savage MM pawlkom cu an phone line an phit sak.

Hih thuthawn pehpar in 21 Savage MM Facebook page cun “kan Hotline phone number a simi +95**** cu hman theih nawnlo dingin in phit sak. Curuangah mipi thawhkhawmmi bawmnak cotuding CDM ih tel cozah hnaṭuan pawl cun direct in kan Facebook chat-box ah in pehtlaih dingin thu kan lo than a si.”

“Pehtlaihtu kan neitam ruangah kan lo reply theilo khalle thinsauten in hngak ṭento ko uh. Mipi thawn olsamten pehtlaih theiawsal dingin Hotline number thar kan tawlrel lai a si” tiah an tarlang.

Cuvek ṭhiamṭhaim in cozah hnaṭuan CDM tuah pawl bawmkhaitu GWSM pawlkom khalin Facebook page inbox lam ah direct pehtlaihawknak nei dingin mipi hnen ah thuthannak an nei.

Tuhrihtiangah CDM tuah cozah hnaṭuan pawl bawm ruangih phone line phit tuar pawl cu Go Fund Me, ၂/၂၀၂၁ ခိုင်မြဲသောလက်များ, We Support Heroes၊ Civil Disobedience Donation le General CDM pawlkom pawl an si tiah BBC in a tarlang.

Leave a Reply

Your email address will not be published. Required fields are marked *