Ralkap Soisel in Aung San Suu Kyi dinpitu Tlawngta A Hlo, FB account khal a hlo cih

Facebook ah Kawl ralkapbawi sawisel in Aung San Suu Kyi dinpinak ca thlahtu Khaing Khant Kyaw (ခိုင်ခန့်ကျော်) cu a sungkhat unau pawl in an pehtlaih thei nawn lo tiah ramsung media in an tarlang.

Amah hi Tatmadaw ralkap a siih Defence Services Medical Academy ah Sii lam fimnak zirin kum 2 nak kai rero lai a si.

“August thlacem hrawng in kan pehtlaih thei nawn lo. A nu le pa khal in ziang a cang ti an thei lo. Biak theih um sun a ralkappi pawl hnen ah a thuhla kan sut” tiah a sungkhat naivai mi pakhat cun ramsung rinsantlak media Myanmar Now hnen ah a sim.

Khaing Khant Kyaw cun ‘Khaing Khant Kyaw (Cubic K)’ timi Facebook account hmangin rampi rak uk dahtu နေဝင်း, ခင်ညွှန့်, သန်းရွှေ pawl ih thuanthu le rampi thuron Aung San Suu Kyi thuhla pawl cu khaikhih in a mai` FB thawn August thla ah a rak thlah dah.

Cuhleiah ralkap Daan le Dun soiselnak cu a mai Facebook cahmai ah a thlah ih Aung San Suu Kyi faknak cangan mi khal a rak share dah.

August 22 khal ah Thuzar Khaing timi FB account hmangtu ih cathlah mi “hruitu ṭha timi cu” (Aung San Suu Kyi zuk kilh cih mi) cu a mai FB cahmai ah a rak share dah.

Atu ahcun a hman mi Facebook account cu hmuh ding a um nawnlo ih hlawnsaktu an um siding zum a um.

Hih thuthawn pehpar in Myanmar Now in Commander-in-Chief of Defense Services hnen ah thusutnak a nei ih, zung lam cun “Khaing Khant Kyaw in Facebook ah ca a thlah ti cu kan thei. Cubak cu theih mi dang kan nei lo” ti`n an let ih Tatmadaw Information Committee ah sutciang dingin an khih hmuh.

Myanmar Now cun thuhla umdan theiciang dingin Tatmadaw Information Committee a call nan khat lam in phone an kai lo.

Khaing Khant Kyaw cu Bago ramṭhen Pyay khua mi a siih Yangon, Mingaladon Township, Defence Services Medical Academy ah Sii lam fimnak zirin kum 2 nak kai rero lai a si.

2017-2018 kum ah 5 D thawn Phun 10 a ong ih a mark in ဆေးတက္ကသိုလ် a ban lo ruangah Defence Services Medical Academy ah fim zirmi a si.

Ahloh thuthawn pehpar in sungkhat unau rualpi pawl in zingzoinak an nei rero ih a Tlawng kainak khal ah ca an kuat ringring tiah MN cun a ngan a si.

Leave a Reply

Your email address will not be published. Required fields are marked *