Ralkap porter dir ṭih ah le humhimnak hawl in Yangon suahsantu Tingteel an luan zo

Kawl ralkap in February 1 ih rampi thuneihnak a la hnu ah Yangon khuapi cu ralram vekah a cang.

Nitinten mi an kap that ih duhduh in mi an kai, mi an vuak an thawi, duhduh in porter an dir ih ziinpi ih ralkham retmi thilrit phunphun mi an phur/ṭhawn ter, mi thil an siatsuah hlei ah an duh mi thil tinkim an la hluahhlo ruangah khuate lam ih sungkhat unau nei pawl cun Yangon khuapi an suahsan. khuate lam pan ih beunak hawltu mipum Tingteel an kim zo.

Ralkap pawl in Martial Law an phuangnak လှိုင်သာယာ၊ ရွှေပြည်သာ၊ တောင်ဒဂုံ၊ မြောက်ဒဂုံ၊ မြောက်ဥက္ကလာပ le ဒဂုံဆိပ်ကမ်းမြို့နယ် pawl cu cetzung company tamzet umnak a siih hih hmun pawl ah khua dang ihsi hnaṭuantu mipum million khat hnak ih tam an um.

Nan, tu ahcun China ram in a darh thokmi Covid 19 ruangah hnaṭuantu pawl in kum khat kim zik harsatnak an tuar zo hlei ah Myanmar kumpi cozah thuneihnak latu ralkap cangvaihnak ruangah hnaṭuantu pawl cu harsatnak in a bet hai ih ei-in umnak hmunram hrang lawng siloin an nunnak tiang a him nawnlo ruangah hnaṭuantu tamzet cun Yangon an suahsan a si.

“Pangai ahcun hnaṭuan khal a remcang ih khua ah an tlung lemlo. Tu ahcun zohman kan him nawn lo. Zaan khalah ṭhiṭha in itthat theih a si nawn lo. Inn lelo hruang thawn kulhmi tivek khal ah an duh tikah an lut ih mi an kai, mi an that tikah ziangkim hi a remcang nawn lo. Curuangah Yangon suah san in khuate lam ih tlung an tam.”

“Cun, mithi mihlo an tamtuk tikah nu le pa pawl khalin mi an seherh tuk. Khua kan tlung ruangah kan him tinak cu a si hran lo. An umnak tapiang ah himnak timi a umlo. Nan, Yangon ai cun khuate lam cu a zia um deuh ti men a si” tiah suahsemnak khua ih tlung zotu လှိုင်သာယာ cetzung ih hnaṭuan mipakhat in a sim.

Mipi pawl in nitinten duhphorhnak an nei ringring nak တာမွေ၊ ကျောက်မြောင်း၊ စမ်းချောင်း၊ တောင်ဥက္ကလာ၊ သာကေ တ၊ ဒေါပုံ၊ လှိုင်၊ ကမာရွတ်၊ စတဲ့ မြို့နယ် pawl khalah ralkap pawl cu sunzaan tiloin an vak an tawi ih lamziin kerkawn khalah meithal an kap puak hluah hlo.

Mipi pawl cu duhduh in porter an dir ih ralkham hrang ih hmanmi ziinpi ta thilrit zetzet pawl cu an thiar/phur ter ciamco. Duhphorhnak ih hruaitu siding an zum mi pawl cu thusutnak khal neita loin an inn ah an luhcilh ih duhduh in an kai hluah hlo.

Cuvek dinhmun a si ruangah Yangon khuapi cu a suahsantu an tam vivo ih nitin`n a suahsantu an tam vivo. (RFA)

Leave a Reply

Your email address will not be published. Required fields are marked *