Ralkap pawl in Kohhran paisa an fir hlei ah an rawl suan cia an ei sak thluh

April 7 ih Kalaymyo doawknak cu Kawlram pumhuap in a thang. Amalbik minung 12 hrawng an thi tiah ramsung media ṭhenkhat in an tarlang.

Zingpit khuavang hlan in SAC ralkap pawl cun mipi kilhimtu Kalay Civil Army umhmun khuarnak cu RGB bomb thawn an kap thok.

KCA lam khalin hriamhrei ralthuam an neihsun suah in an do ve nan an hmanrua a thlauaw tuk ruangah mipi ralkap pawl cu dung an siip.

Umhmun an khuarnak cu ralkap pawl in an ṭhiat bal ih mino khal an kai tamzet. Cuih tlun ah SAC ralkap pawl cun meithal hriamhrei kenglo, KCA thawn pehtlaihnak neilotu khal an kap that.

Cuvek a si ruangah mipi ṭhenkhat cun an Inn le Lo tlan san in hmunhim beunak an hawl. Culai takah SAC ralkap pawl cun mi inn an boh ih an bizu, thinkuang tivek khal an let sak thluh tiah ramsung media ṭhenkhat in an tarlang.

Inn boh tuar le thilri hlo an um hnuaihni nan online ih hmuh ding tambik cu Kalaymyo, Kyo Thone Pin (ကြို့သုံးပင်) veng ih inn an boh mi a si.

Kyo Thone Pin (ကြို့သုံးပင်) veng ih Inn boh mi thuthawn pehpar in cuih veng ih umtu ka si tiawtu mipakhat cun “tuizing April 7 ah Kalaymyo, Kyo Thone Pin (ကြို့သုံးပင်) veng ih inn ṭhenkhat cu SAC ralkap pawl in an boh.”

“Mi inn sung ta thilri pawl cu an duhduh an lak ih an tv tivekkhal an khuai sak. Cun, an rawl suan cia le hmeh tivek tiang an ei sak thluh. Inn khat tla cu kohhran paisa an ret mi an fir sak tlun ah inntang ih retmi motor cycle 2 an lak sak cih” ti`n Facebook cahmai ah a ngan.

Leave a Reply

Your email address will not be published. Required fields are marked *