Ralkap le palik pawl Hnaihnok lo dingin thu an than

Nitinten mipi zonzai rethei terin Khuate le biakinn tivek tiang mai lungtho dan i zirin siatsuah ṭheutu SAC ralhraang cun an sakhaan pawl le ralkapzung tivek hnaihnok kahdonak tuah lo dingin thu an than ih, ralrin pekaw cingin a thlun duhlotu cu kan thungrul ding ti`n April 22 zaan ah thu an than.

“Remdaihnak thawn pehparin hmaton thurel sawmnak a um lai ah siseh, thurellai tivek ah remdaihnak hnaihnok theitu pungkhawmawknak, cangvaihnak, hmunram nornak, humvennak tuahtu ralkap sakhaan kahnak, ralkapzung hnaihnok buaihnohnak tivek tuah lo dingin theihter nan si ih thusuah thlunlotu cu tatmadaw ralkap in a ṭuldan vekin hmalak thungrulnak a nei ding” ti`n SAC ralhraang cun thu a suah.

Cuhleiah “kum khua daih remdaihnak tumtahin 2022 kum cem tiang kahdonak colh hrih a si hlei ah, remdaihnak hrang zinkong phunphun hawlin hmalaknak a um rero” ti`n thusuahmi ah an tarlang.

Ralhraang SAC ralkap cun Tlangpar hriamkai pawl thawn kahdonak kan cawl hrih an ti nan Kachin, Kayin, Mon, Magwe, Sagaing, Chin ram tipawl ah nitinten kahdonak an tuah hlei ah kaphnih doawknak a um lo khalah Vansang ihsin kahdonak an tuah ih bomb an thlak ṭheu hlei ah nitinten Khuate inn pawl an urkaang a si.

SAC ralhraang in ralkap sakhaan hnaihnoklo dingin thu a than hlan ah ralhraangbawi Min Aung Hlaing in remdaihnak hrang thu rel tlang dingin Tlangpar hriamkai hruaitu pawl a sawm hai a si.

Leave a Reply

Your email address will not be published. Required fields are marked *