Ralkap le palik pawl cun Mipi tuamhlawmtu Red Cross hnaṭuan pawl an bat thok

Myanmar ralkap le palik pawl cu duhphorhnak neitu mipi kutthlak lawng duhtawk loin hliamtuar pawl tuamhlawm ding i pumpeawtu redcross le Social Welfare pawlkom hnaṭuan pawl par tiang kut an thlak thok thlang.

March 3, North Okkalapa Township ih kut an thlak mi phei cu CCTV in a zuk ngah ih an vuak thawi dan cu a rapthlak tum lawmlam.

Hliam tuar pawl tuamhlawm ding i pumpeawtu mipathum cu an mawṭaw par in an ṭum ter ih nasatak in an thawi ciamco.

Video sung i a lang dan ahcun palik pakhat cun shotgun thawn an mawṭaw a kap sak hnu ah mipakhat cu a pal ciamco. Cuhnu ah a malbik palik 6 in nasatakin an thawi ciamco ih meithal taw lam khalin an sut ciamco. Cuhnu ah kaihkhih an tuar bet ih an mawṭaw khal an siat sak tiah ramsung media ṭhenkhat in a tarlang.

March 2 khalah Myanmar redcross team cun an hnaṭuan pawl kutthlak an tuar thu le mina phur nak an mawṭaw tvk khal siatsuah an tuar thu ca in an suah.

Cuih ca ahcun “rampi huap khuapi ṭhenkhat ih kan hnaṭuan pawl kutthlak an tuar ih kan mawṭaw khal siatsuah sak kan tuar. Kan nih lam cun redcross phungdaan 7 thawn milaw in cangtheithawk mi kan bawm mi a si.”

“Curuangah International Humanitarian Law-IHL upat in kan hnaṭuan pawl hi in bat sak nawn hlah uh. Kan nih lam cun redcross thantar tarlang in le daan thawn milaw, buaibainak um lo ten hnaṭuan thei dingin hmalaknak kan nei vivo thotho ding a si” tiah an ngan.

Leave a Reply

Your email address will not be published. Required fields are marked *