Ralkap lam ṭang VengLal sualral Naam thawn dawt that tuar

Yangon ramṭhen, Thaketa khua ih ralkap lam ṭang Veng Lal TetPine cu May 3, zaanlam nazi 3 hrawng ah mipathum in naam thawn an dawt that.

Khuami pawl ih sim dan ah amah hi ralkap lam ṭang a si ih veng sung mipi ih bungbel tal ṭheumi khambiktu a si hlei ah rit theih sii zuartu khal a si cih ti a si.

Khuami mipakhat cun “SAC ralkap hnen ih miheekhmang Dalan maktara a si. Naam thawn an dawt that ruangah ralkap le palik in atuhi veng sung an cawklet thluh” a ti.

May 3, zaanlam nazi 3 luan hrawngah mikhual cazin report ding vekih mawṭaw cycle thawn va pantu mipathum in naam thawn an dawt mi a si ih Siizung ah an tlanpi nan Lamlak ah a thi.

Khuami pakhat cun “amah hi kum 48 hrawng a si ih tuhlan ah cozah hnaṭuan rank niam a rak si. Ralkap pawl in an lam ṭang dingin sinaksang thawn an thlem ih VengLal an ṭuan termi a si. Misualral tak a si ih April thla hrawng ah bungbel tal ruangah pitar pakhat a kai ih zaanvar zabeng a fial. A cawl pang cun ralkap pawl a vuak ter. Cuvek roriih misual a si” a ti.

Veng Lal TetPine dawt thattu mipathum cu mawṭaw cycle thawn an tlan cih ih, tu ah ralkap le palik in an hawl rero tiah MCTV in a tarlang.

Min Aung Hlaing hohami ralkap in rampi ukhruai thuneihnak an la hnu ah an mah dodaltu mipum 5000 kimzik an kai zo.

Kaihkhih tuar mitamzet cu Veng Lal TetPine vek miheekhmang Dalan pawl ruangah a si tiah miṭhen cun an sim ih Dothlennak Lamtluang ding cun hibang milai pawl kan thianfai hmaisa ṭul tiah an sim.

Leave a Reply

Your email address will not be published. Required fields are marked *