Ralkap in LuMin an kai nak san

Pukmah 505 thubuai orhter a simi Lemcang thiam hminthang LuMin cu February 20 zaan ṭim ah Palik in an kai.

Inn ihsin an suahpi hnu ah a nupi Khin Sa Pee Oo in Facebook ah live a thlah ih “palik tamzet in kan inn sangka an siat ih Lumin an kai. Awka hringhro zet hmangin an cangvai ih khawi lam ah an hruai tum, ziangruangah an kai tikhal rel lo in an hruai cih. In run hram uh law” ti`n ṭap phah in a ṭong phah.

LuMin telin ramsung milar 6 cu cozah dodal dingin mipi lungtho tertu an si tiah ralkap in pukmah 505 thubuai orhter in February 17 ah kaih theihnak ca an rak suah.

Tuhrihtiangah amah rualih thubuai an tuah sakmi lakah LuMin lawng kaihkhih a si hrih ih an kaihnak san cu February 20 zaanlam ih video a thlah mi thawn pehparawnak a um ding tiah mipi lam in zumnak an nei.

Cuih Video cu minute 5 kimzik hrawng a sau ih zarhte ni ih Mandalay buainak, hriamhrei hmang ralkap dem nak le ralkap uknak dotu mipi pawl kan fimkhur a ṭul zia pawl a rel tel.

LuMin cun “tuini Mandalay thilthleng cu theih nuamlo, tuhthang duhumlo zet a si. Keimah bangin mipi pawl khalin tuarhar ningnat um nan tiding, kei khal ka thin hnengnak a puakkuai.”

“Asinan, tuṭum buainak ah mipi kan thupit zia hi hngilh hlah uh si. Atu an cangvai dan kan zoh ciang a si le tumtahnak an nei ti hi kan hmu thei. Meithal hmanglo khalin mipi an ṭhekdarh thei. Cucingin meithal an hmang thotho cu thang in kam mi a si.”

“Ramleng lam ah an hmakhua a pit vivo tikah an hrang ih lamziin pakhat um sun cu mipi hi kan si. Thahrum, a hrang zawng i cangvai dingin a haha ten mipi in nor rero. Cumi theithiam loin le supaw thei loin kan cangvai pang a si cun an Thang kam mi ah kan lut a si mei ih 88 kum vek thuanthu kan nolh sal ding a si” a ti. (Kimciang in a video a tanglam ah zoh aw)

Himi thucah tawi a nei mi ah ralkap hmuitinmi a rel famkim thluh ruangah kaihkhih a tuar mi si ding ti`n mitam zetin zumnak an nei a si.

Leave a Reply

Your email address will not be published. Required fields are marked *