Ralkap cozah in “22222” Lamzawh Duhphorhnak neituding mipi ralrinnak a pe cia

February 22, “22222” ah nasa zetih Lamzawh duhphorhnak neitumtu mipi pawl cu ralkap lam in ralrinnak a pe cia ih ramsung buainak sosang sinin meithal kahpuah dinhmun tiang a thleng pang ding a phan um zet.

Ralkap cozah cun “rampi ukhruainak hnaui ih Daan le Dun thawn milawmi duhphorhnak cu neih a thiang nan rampi Daan pahbalmi duhphorhnak a suak pang cun Daan vekin hmalaknak kan nei ve ding ti`n MRTV ah thuthannak an nei.

“February 22 ah cozah hnaṭuan pinsin lakzo pawl hlawh lak theihlo dingin mipi in hnaihnok cangvaihnak an neitum ih online ah nasaten thuthannak an nei” tikhalin a tak ih khihhmuhnak um lo mi puhmawhnak thawn ralkap in mipi an phut a si.

Mipi lam in online in siseh a leng ih tlangaunak zawng khalin siseh thaisun duhphorhnak ah rampi huap in cangvaihnak nei cio dingin simtheiawknak a um ruangah ralkap cozah in tuvekin ralrin peknak thu an than mi a si.

Tudinhmun ah mipi lam in 22222 lamzawh duhphorhnak hrang nasaten timlamnak an nei vekin ralkap pawl khalin Yangon khuasung hmun ṭhenkhat ah ralkap mawṭaw ret cia ṭhepṭhep in thaisun hrang timlamnak an nei ve tiah BBC in a tarlang.

Leave a Reply

Your email address will not be published. Required fields are marked *