Ralhraangbawi MAH in Journalist Danny Fenster a thlah zalen nak san

SAC ralhraang in tuini November 15 ih a thlah zalenmi Journalist Danny Fenster thuthawn pehpar in an thlah nak san le SAC ralhraang lungput cu tuihlan ni 3 luan zo ah mipakhat in dik zetin a rak relsuak thluh.

Tayza Hliang timi FB account hmangtu cun Danny Fenster an thlah zalen naksan cu SAC ralhraang ih thluk men a si tiah a ti.

“Journalist Danny Fenster cu ramhnih pehtlaihawknak phuahlam hawlin zamrangten Thawng an thlak dingih Kawlram ihsin an dawi ding. Bill richardson vek, cozah thawn pehtlaihawknak neilotu politician hmangin an ra dirsuak ding. (Thawngthlak ta lo cun thlah zalen danding a har deuh. Curuangah thubuai an tuahsak mi cu hmanhmawh zetin hmalaknak an nei ding)”.

“Cun, daan loin rampi thuneihnak latu SAC ralhraang cu mi rel vekin an rak sual ciamco lo. Hmaton thureltlang theih an si ih, Khatlam pawl (NUG, PDF, CDF ..tvk) lungruhtuk ruangah le remdiahnak an duh lo ruangah atuvek dinhmun kan thleng ti`n thu an suah ding” tiah TH cun a FB cahmai ah a tarlang ih “tuhlan ih UK cozah palai rak ṭuan dahtu Vicky Bowman khalin cutin a relsuak dah” a ti.

Cuihtlunah “cupawl khapawl thawn thureltlangnak an nei tikah hriamhrei ralthuam thlak san in cabuai par ih kut an suang hmasa thluh lawngah khat le khat zumawknak a suak thei ding ti`n thluak hmangin ṭongkam thiam zet pawl in an rel dutdo ding” tiah a ti.

Frontier Myanmar editor Danny Fenster cu Kawlram a buai hnu, May thlalai hrawngah SAC ralhraang kaihkhih a tuar. Thla 5 luan thawng an thlak ih November 12 ah SAC ralhraang kuthnuai ih um thuṭhenzung in kum 11 thawngtlak dingin daan a tat nan November 15 ah rinlopin an thlah zalen saal tiah theih a si.

Ziangruangah an thlah saal timi cu theihfiang a si lo nan The New York Times cun Bill richardson bawmnak thawn a luat suak tiah a tarlang.

Siarbet : SAC ralhraang in rinlopin Journalist Danny Fenster thlah zalen

SAC ralhraang in rinlopin Journalist Danny Fenster thlah zalen saal

Leave a Reply

Your email address will not be published. Required fields are marked *