Ralhraang SAC ralkap pawl mah le mah an mual phoh aw

Kachin ramkulh, Myitkyina peng ah mualphothlak zetin ralhraang SAC ralkap pawl mah le mah an kapaw ih mi 8 an thi tiah theih a si.

Thuthang dongtu KTM tarlangdan ah mi kap thattu ralbawi Aung Tan (အရာခံဗိုလ် အောင်သန်း) in a kut hnui ih um ralhraang ralkap pawl a kap that ih a hmun rori ah mi 6 thi in, a dang 2 cu siizung ah an thi ti a si.

Kahawknak a suak thok dan cu June 6 ah ralhraangbawi ṭuanvo neitu pawl in Myitkyina peng, Pyihtaung khua ih tatmadaw training center No 7 an vehvai ih, humvennak ṭuanvo latu ralhraang 10 pawl cu sii le zu ri in an rak um.

Cumi thu ah training center ih ṭuanvonei ralbawi Aung Tan kawk a tuar hlei ah hremnak an pe ruangah hngirṭeuin a kut hnuai ih ralhraang pawl a kap that.

“Humvennak ṭuanvo latu ralkap pawl zu an ri. Riitsii an kol mi pawl tla an hmusuak thluh. Cumi thu ah ralbawi Aung Tan kawk a tuar.”

“Ningzak thinheng zetin humvennak ṭuanvolatu zu le siiri ralkap 10 pawl cu a ko khawm ih a kap that hai. 6 cu a hmun rori ah an thi cih ih mi 2 siizung ah thi in, a dang 2 cu an tlanhlo. Amah khal pistol pakhat le meithalsau pakhat thawn a tlanhlo ve” ti`n ralhraang thawn naivaitu Hram pakhat cun KTM hnen ah a sim.

Tuhlan khalah hivek mah le mah kahthatawknak thuthang a puut darh tam zo ih, ramsung mipi le leitlunhuap mipi hmai ah lungrual le remdaizet vekih langtumtu ralhraang ralkap hrang ahcun mah le mah mual phoh aw rero vek a si.

Leave a Reply

Your email address will not be published. Required fields are marked *