Ralhraang SAC ralkap pawl in Taungphila Baptist Biakinn area an hrawh

April 10 zing ah Ralhraang SAC ralkap pawl in Kalaymyo Taungphila veng, Taungphila Baptist Biakinn area an luhhnawh ih paisa kyat ting 30 lenglo an fir sak.

An luhcilh hlan ah biakinn area sungih Centenary building dot 3 cu nasaten an kap ih, vanṭhatthlak zetin a luahtu innsang lam ah hriam tuar le khawngaw an um lo.

“SAC ralkap in biakinn area sung ihsin PDF pawlin in kap an ti. PDF in riahnak khalah an hmang ṭheu an ti ih bomb kammi khal kan hmu an ti.”

“Nan, cuvek ziang hman a um lo. Tuhlan khalah a um lo. Um bang sehla a luahtu innsang pawl an kai ding. Phuahlam an hawl men mi a si” tiah tualsungum mipakhat in a ti.

Ralhraang pawl cu innsung ah luttahrat in hmuh dangdang an ceekkual ih inntektei` thil ṭhenkhat le paisa kyat ting 30 luan an fir sak tiah theih a si.

Biakinn area sung ih um inntekpa cun “Biakinn kan umnak Centenary dot 3 innpi cu tuzing ah in phom neknek. Kan umnak room te lawng kan sungza in kan him.”

“Pathian kan thangṭhat. Bawipa kan lungawi.
Kan neihmi tingkul luan le midang paisa ka kai sungmi tinghra thawn zatekom Kyat ting sawmthum lenglo in laksak. Thlacam in bawmtu nan zate hnenah kan lungawi” tiah a ti.

Input via : CLT

Leave a Reply

Your email address will not be published. Required fields are marked *