Ralhraang SAC ralkap le Shan State Army an ngiar aw

Shan State Progressive Party (SSPP) tikhal ih koh mi Shan State Army (SSA) le Restoration Council of Shan State (RCSS) karlak boruak a sosang zet lai ah SAC ralhraang in Shan ralkap SSA sakhaan 3 suahsan dingin thu a pe cu Shan ram boruak a sosang sinsin.

Shan ramkulh, Mong Hsu peng, SSA ralkap sakhaan 3 suahsan dingin June 4 ah theihter an si ih June 10 tiang SAC ralhraang in caan a pe hai.

Sakhaan suahsan dingih thu an pek nak san cu raldonak lamsial an tum nak hmun pawl ah SSA ralkap Sakhaan a um ruangah a si ih, SSA lam cun sakhaan suahsan an tum lo hlei ah in ra nor pang cun kap dingin kan ralring cia ti`n thu an suah ve.

Suahsanding an ti nak hmun hi tuhlan kum 10 lenglo, SSA ralkap pawl umhmun rak khuar zonak hmun a si ih, suahsan nak ding san a um lo ti`n SSA lam cu ṭhawnawk tum lo in an um hnget tum sawn lam.

Shan ralkap SSA um nak kiangkap ah ralhraang ralkap pawl ralthuam thawn an um ṭhepṭhep zo ti a si ih, SSA lam khal dungsip tum cuang lo in an ralthuam pawl an timlam ve.

Tu dinhmun ah SAC ralhraang le Shan ralkap pawl cu ziangtiklai khalah kap aw thei dinhmun an si ruangah kiangkap naivai khawmi pawl an thinphang zet tiah theih a si.

Leave a Reply

Your email address will not be published. Required fields are marked *