Ralhraang ralkap in mipakhat an that hlei ah Khawmi ei-inding Kyat ting teel man lak sak

April 18, zinglam nazi 11 hrawngah ralhraang SAC ralkap in Magway ramṭhen, Gangaw peng, Hnankhar khua an luhcilh ih kum 67mi putar pakhat an that hlei ah Khawmi ei-inding kyat tingteel man an lak sak.

Phungkitlawng ih retṭhatmi siiti cuai 800 hrawng, nicia tin 100, mepee tin 50 tipawl telin thil mankhung phunphun an la ti`n a hmutu mipakhat in BBC hnen ah a sim ih “Putar pakhat an that” a ti.

Khawmi pakhat cun “Lamzawh duhphorhnak nan tuah ti`n phuahlam an hawl ih khuasung ah an lut.”

“Atakcun ei-inding an nei nawn lo ruangah khawmi ei-inding an lak sak. A zaten an la thluh. An duh lo mi cu an urkaang ta. Kyat ting teel man kan sung” a ti.

Rampi a buai hnu ah ralhraang ralkap pawl in Hnankhar khua voi 10 lenglo an luhcilh zo ih inn an urkaang sak hlei ah vanzam thawn khal nasaten an kap zo.

Khawmi zate deuh thaw cu sahimnak hawlin hramlak ah an beu ih, boruak daih lam a pan thlang ti`n khuasung an kir saal hnu ni reilote ah ralhraang suamnak an tuar lala a si.

Leave a Reply

Your email address will not be published. Required fields are marked *