Ralhraang pawl ih rinsan ememmi Ralbawi hlun kah that tuar

SAC ralhraangbawi pawl thawn pehtlaihawknak neitu ralbawihlun U Ting Aung (ဗိုလ်မှူးသိန်းအောင်)cu November 4 ah zo a si ti thei lomi mipakhat in meithal thawn a kap that.

Zinglam nazi 7 luan hrawngah a nupi thawn leng an suakvak lai ah meithal kap an tuar. Amahcu a hmun rori ah a thi cih ih a nupi cu meithal hriam tuar in Yangon siizungpi ah an tlanpi tiah venghnen pawl in an rel.

ိုလ်မှူးသိန်းအောင် thih thu thawn pehpar in SAC ralhraang lam cun hitin thu an suah. “November 4 zinglam nazi 7 luan hrawngah Yangon, Mayangon Township, no 7 veng ah kapawknak a um ti`n thuthang kan dong. A hmun ah va feh in thuhla kan zingzoi tikah kum 56 mi U Ting Aung le a nupi cu leng an suakvaknak ihsin an tlunglam ah mi pakhat in meithal thawn a kap hai tiah veng sung um pawl hnen in kan thei. A rak bawh cia hai ti`n an rel ih a kap ṭheh veten ပြည်လမ်း lam ah a tlan ti`n kan thei” tiah SAC ralhraang lam in thu an suah ve.

U Ting Aung cu meithal hriam hmun 4 ah tuar in a nunnak a cem. A nupi cu a Kut, a Tai le a Ke ah hriam a tuar ti`n ralhraang pawl thusuahmi ahcun an ngan tel.

U Ting Aung hi ralhraang ta a simi Mytel company ih ṭuanvonei mithupi a si ih, ralkap ihsin colh la zo a si nan Min Aung Hlaing kut thuai ih hnaṭuan ralbawi pawl thawn naivai zetih pehtlaihawknak neitu a si.

An kap that tiih thuthang a suak veten ralhraang pawl in nasaten an ngaihven nan himi ca kan ngan tiangah a kap tu zo a si? ziangruangah an kap that? timi thuthang felfai a suak hrih lo.

Leave a Reply

Your email address will not be published. Required fields are marked *