Ralhraang in hlasakthiam Chan Chan inn an phit sak hlei ah zuar tum bet

Dothlengnak thawn pehparin kaihkhih dingin pukmah 505 thawn thubuai an tuah sak mi hlasakthiam Chan Chan ih innpi cu Ralhraang SAC ralkap in an phit sak hlei ah innpi cu an zuar sak tum tiah theih a si.

Yangon ramṭhen, Thanlyin ih Chan Chan innpi cu tukum thok ah ralhraang ralkap pawl in an phit sak mi a si.

“Thanlyin ih ka inn cu SAC ralkap in daan loin in phit sak hlei ah in zuar sak tum. Himi inn hi lei hlah uh. Nan lei khal a si le daan kalh a si. Dothlengnak a cem hnu ah, keimah innpi a si mi ka thilri ka lak saal tikah a leitu hrangah a lak men a si ding” tiah Chan Chan cun a rel.

Hih thu hi thulengvak men sivekin miṭhen cun an rel nan Chan Chan pasal khalin atak a si thu, Irrawaddy hnen ah a nemhnget zo a si.

Chan Chan cun “atikcu a kim tikah ka innpi ka lak saal cun a leitu hrangah paisa lawng an cem liam men. Mi inn an zuar sak zo mi pawl khal a leitu hrangah paisa an sung lak men. Inn neihnak ca thupi pawl cu a neitu hnen ah a um thluh ruangah an lei khal a si le daan kalh a si” ti`n amahcun a relbet hrih.

Chan Chan cu Dothlengnak thapetu a si ti`n ralhraang ralkap in kan dung kum ah pukmah 505 thawn thubuai an tuah sak hlei ah, tukum February thla ah a inn an phit sak.

Chan Chan cu MAH in rampi ukhruai thuneihnak a la hlan ah nau nei dingin Italy ram ah a feh ih, nau a nei hnu, tu khalah Dothlengnak hrangah hmun pakhat ihsin ṭanṭhat a la rero tiah theih a si.

Leave a Reply

Your email address will not be published. Required fields are marked *