Ralhraang Do tumtu Shan ralkap pawl mah le mah an buai

Ralhraang ralkap le mipi ralkap karlak boruak a sosang zet lai ah Shan ralkap a si mi SSPP/SSA (ရှမ်းပြည်တိုးတက်ရေးပါတီ) le RCSS/SSA (ရှမ်းပြည် ပြန်လည်ထူထောင်ရေး ကောင်စီ) karlak ah hmuawthiamlonak a suak ih boruak a sosang zet.

SSPP kaihruaimi ralkap thazaang 100 hrawng in tuni August 1, zinglam ah Pinlon peng, WanKung khua kulh tahratin mawh neilo khawmi 31 pawl an kai tiah RCSS lam in media hnen ah an rel ih, “cupawlcu SSPP sakhan ah hruailut an tum” tiah thuthang an suah.

Cuih thu ah SSPP lam in simfiahnak an tuah ve ih “kan kai mi si lo in thusut men dingah kan hruai mi a si” ti`n an sang let. Cuhleiah buainak tawthoktu cu RCSS lam sawn an si ti`n SSPP in a puh ve.

“Kaphnih buainak suak dingin RCSS ralkap pawl in a thup thiar in kan sakhaan le raldonak lamzin pawl ah in kap. Cupawl thawn pehparnak an nei le neilo sut duh ah Khawmi pawl kan hruai sung mi a si” ti`n SSPP lam cun tualsung media hnen ah an sim ve.

Cutiih puhawknak a um lai fang ah Khawmi kaitumtu an um ruangah Laihka myone, Naunghlaing khawmi raltlan 200 lenglo an um thu le ei-in siivai bawmnak ṭulmi raltlan 1000 hrawng hramlak ah an tar thu, thuthang a suak ih video tla tarlang cih a si.

Asinan, tarlangmi video ih langtermi raltlan pawl cu zoi` pawl kaih tum ruangah an tlanmi a si ti cu felfaiin theihfiang a si hrih lo.

Tu dinhmun ah atu ih tarlangmi Shan ralkap pawl buainak hmun telin Thlanglam Shan ram pawl ah ralhraang ralkap, RCSS le SSPP ti`n Ki 3 rorin boruak a sosang ih Shan ram boruak thlirtu pawl cun ziangtiklai khalah kapaw thei dinhmun a si tiah zumnak an nei a si.

Leave a Reply

Your email address will not be published. Required fields are marked *