Ralhraang dinmi Mipi humvennak hrang ṭuanvolatu Khawmi zaten ralrin an pe

Ralhraang SAC ralkap in rampumhuap khua ṭhenkhat ah “Mipi humvengtu – ပြည်သူ့လုံခြုံရေးအဖွဲ့” timi hmin thawn pawlkom dinin ṭan ṭhat a la ih pengṭhen, veng sung le khawte pawl ah hmalaknak a nei rero.

Cumicu ralhraang hnaṭuan koh thei sin nak dingah siseh, mipum zawngih thazang a mal vivomi SAC ralkap ai awh ding tumtah in le mipi ciocio mah le mah doawktertum tumtahnak thawn hmalaknak an nei mi a si ti`n NUG cozah in a pom ih cuih pawlkom a koptu cu mipi menmen ah pom theih an si nawn lo ti`n NUG in thu a suah.

May 26 ni khen mi NUG thusuah ah cun “Tuhlan ah ပျူစောထီး၊ သွေးသောက်၊ သွေးသစ္စာ၊ စွန်ရဲ tivek hmin phunphun hmangin ralhraang pawlkom an din ih, a tu ah, mipi ciocio mah le mah doawkter tumin anmah kaihhruai dingmi “ပြည်သူ့လုံခြုံရေးအဖွဲ့” timi ralhraang pawlkom cu an lam ṭang naingnganzi party le pawlkom ṭhenkhat pawl thawn hnget zetih toh thei dingin din thok hmalaknak an nei rero.”

“Cumi ih a teltu pawlkom siseh, mibulpak khal NUG in ralhraang tiih a pom zomi SAC ralhraang ṭanpitu tiah pomin Daan vekin hrem an si ding” tiah an tarlang.

NUG cun “ပြည်သူ့လုံခြုံရေးအဖွဲ့” ralhraang pawlkom sungih telvetu pawlkom ṭhenkhat le mibulpak ṭhenkhat thuhla cipciar kan nei zo ti`n an tarlang ih cupawlcu mipi menmen ah pom theih an si lo ruangah Daan vekin hrem an si ding ti`n thusuahmi ah an ngan tel.

NUG in ralhraang pawlkom ih teltu ralrin a pe rualin duhlo cingih luttermi mipi le sual sir pawl hrangah mah le umnak thawn neihbikmi mipi ralkap kop lohli dingin thu ron a pe cih a si.

Leave a Reply

Your email address will not be published. Required fields are marked *