Ralbawi Zaw Min Htun in CNN thawn interview nak neitu mipi an kai nak san relsuak

Myanmar ralkap pawl in CNN palai Clarissa Ward thawn interview neitu mipi an kai nak san cu tuizaan CNN ih video thlah mi sungah ralbawi Zaw Min Htun in a rel fiang lai a lang tel.

Cuih video cu Clarissa Ward in ralbawi Zaw Min Htun interview a tuah lai a si ih CNN palai cun “Yangon bazaar kan feh ah mipi tamzet in an hmuh ton mi sim duh in in ra pan. Cumi ah kan mah thawn interview nak neitu mi 5 cu kaihkhih an si tiah thu felfai kan thei suak ih zuk khalin kan hmu thluh.”

“Hi pawl hi ziangruangah nan kai? Sualnak tuahmi tivek teh an nei pang maw? Zangfahten in sim thei pei maw?” tiah CNN palai Clarissa Ward in thusutnak a nei.

Ralbawi Zaw Min Htun cun “Ziang sualnak hman an tuah lo. Mizaan ah thuthang ah ka hmu ih minung 11 an kai tiah ka thei. Kaihkhih an tuar san cu thuphunphun relsuak in bazaar ih mipi duhphorhnak an nei ter ding an phang ruangah security ralkap pawl in an kai nak san a si. Asinan thlah zalen sal lohli an si ding” a ti.

Hih kaihkhih tuar pawl hi CNN lam khalin thuhla felfai zingzoinak an nei ih ralkap pawl cetcang dan khal an theifiang phah thluh.

Clarissa Ward cun amah thawn interview nei ruangih kaihkhih tuar pawl thuthawn pehpar in “kaihkhih tuar 11 lakah kan mah pawl ih zingzoi felmi mi 8 an thlah sal ti`n kan thei ih lungawi um zet” tiah US ram ih CNN news room palai hnen ah a sim ih “himi hin a lang ter mi cu Myanmar mipi hin ziangvek hrengbetnak an tuar ti a lang ter” a ti.

Leave a Reply

Your email address will not be published. Required fields are marked *