Rakhine ramṭhen ah Rocket them a tlak ih kiangkap Leilung a hnin thluh

December 27 zaan ah Rakhine ramṭhen, Munaung (မာန်အောင်) le Thandwe Township (သံတွဲမြို့နယ်) kiang tipi thuanthum ah hman nawn lomi Rocket them a tla ruangah kaingkap naivai khua pawl a hnin thluh.

“Zaan nazi 10 luan hrawng ah Munaung khua nisuahnak thlanglam tipi thuanthum ah Van par ihsin meisa vek thil rang a tlak lai kan hmu. Curualin a ring zetmi thawmvang a thang” tiah Munaung ih um U Htwe Naing in RFA hnen ah a sim ih “Tipi par ih hnaṭuan ngakai Lawng le Tikap ih um khawngaw hliamhma tuar an um le um lo ti cu kan thei ciang lo” a ti.

Thandwe Township, Pyine hluttaw palai U Win Naing khal in “zaan nazi 10 luan hrawng ah Ṭek tlak awn vek thawmvang ringzet a suak ih leilung khal a hnin thluh” a ti.

Hih thuthawn pehparin Thandwe Township khuaUk ṭuanvonei hnen ah RFA in a biak nan let nak an dong lo.

China, Beijing ih vanzam thawn pehparmi zung pakhat in Union of Myanmar Air Transport Authority hnen ih ralrinnak ca a kuat mi ah “December 27, zaan nazi 10:34 ah Munaung Airport thlanglam peng 45 hlat hrawng ah Rocket ih bun telmi ṭangkai nawnlo a them a tla men thei” tiah an ngan a si.

Kum 2016 ah Kachin ram ah 4.5m sau 1.2m kau thir hlum cu Van par in a rak tlak dah ih inn pakhat a siatsuah nan hliamhmatuar le khawngaw cu an um lo. Thir par ahcun Taluk ca a nganaw ruangah China in boruak par ih a thlah mi rocket lole Satellite them siding an zum. Tuṭum, Rakhine ramṭhen ih tlak mi Rocket them khal hi China pawl ih hmanmi Space Junk siding an zum.

Leave a Reply

Your email address will not be published. Required fields are marked *