Rakhine : Covid 19 mina lakah Mi Besia an um lo

Covid 19 suar hnihnak ah August 16 in 26 karlak ih mina thar mipum 184 hmusuah mi ah mina 174 cu Rakhine ramkulh um an si ih, mina besia an um lo tiah Myanmar ram harhdamzung ṭuanvo nei pawl in an sim.

“Mina pawl ah besiatuk lawmam an um lo. Hrok na cu hnihkhat an um. Cuvek hrawnghrang lawng an si ih lungmit luakluak pakhat cu a um” tiah Myanmar harhdamzung ṭuanvo nei Dr Suu Win Piang cun Myanmar Now hnen ah a sim.

Rakhine ramkulh sungih Covid 19 mina tambiknak Sittwe khua ih mina 81 enkolnak siizung ṭuanvo nei Dr Zaw Lwin khalin, “nathrik kan check, a kaaitu an um. Nan, besia an um lo. A umsun khal thilrim theilo fang an si. Cuvek hrawnglawng an siih ṭihnung dinhmun ih um pakhat hman an um lo. A olzawng ih sim ahcun an dam ṭheh si mei” a ti.

Mina pawl cu (1) natnak pianhmang langlo (2) natnak pianhmang malte lang (3) damlonak dang nei (4) mina besia ti`n a dotdot in an ṭhen ih number 4 dinhmun ah zo hman an um lo tiah Dr Zaw Lwin cun a sim ih “ka hmuhdan ahcun hmaisa ṭum ih nathrik cu a hmual a na ih atu suar hnihnak ta cu a hmual a na lo tin ka hmu” a ti.

Atu Rakhine ram ih Coronavirus an hmu mi cu tubai hrawng ih hmuhthar mi nathrik karhzai cak a si maw si lo timi zohhliahnak an nei rero laiih thuthangdang a um bet le kan sim than aw leh ding.

Leave a Reply

Your email address will not be published. Required fields are marked *

error: hahahahahaha !!