Pumcawmnak hrangah CDM tuahtu Sayama ṭhenkhat Thiamtah zir

KNU-ဒူးပလာယာခရိုင် ih CDM tuahtu Tlawng sayama ṭhenkhat cu mahte todelhaw thei dan ding ngaih tuah in Thiamtah rerotu an um ih a zir thok lai khal an um.

Dothleng cangvaihnak ah mipi lam ṭangin CDM tuahtu saya/sayama pawl cu April lam ihsin thlahlawh an la nawn lo ih, tudinhmun ah sumsaw laknak dang nei loin ei-bar ding hrang tiang harsatnak an tong ruangah Thiamtah in sumsaw lakluk danding an ngaih tuah hi a si.

“Rampumhuap in cozah hnaṭuan CDM tuahtu mitamsawn cu tudinhmun ah harsatnak kan tuar nasa cuang. Khawpkhamṭawk thla hlawhte thawn khuasa cio kan si ih hlawh neilonak thla 1-2 a si thlang tikah ei-bar ding hrang tiang harsatnak kan tong thlang. Curuangah sumsaw laklut danding ngaih tuah in Thiamtah ka zir. Tu ahcu tawkmawi ka thiam thlang ih Order umdan ihzir in Thiam ka tah ṭheu. Sumsaw laklutmi thawn deihaw dingin kan khawsa ṭul” tiah Kayin ramkulh CDM tuahtu Sayama pakhat cun a ti.

Tuhlan ihsin ဒူးပလာယာခရိုင် ah Thaimtahnak thawn pumcawmawtu hnih-thum an rak um cia ih, Thiamtah thiam mino le CDM tuahtu Sayama ṭhenkhat ṭuan tlangin Thiamtah zirhnak an nei.

“Hnamphungdan cawisangsin dingin inn tin ah thiamtah zirh vivo seh la tiah sunmang ka nei dah. Atuah, thuphunphun ruangah khua ah kan um khawm ih a remcang zet. Thaimtah thiam mino le Sayama pawl ṭuan tlangin cangvainak an nei rero” tiah khuami pakhat cun a rel ih “Neta cun, hih hmun ih Thaimtah ra zir thei lo pawl hrangah Video zuk in online lam ah kan thlah leh ding” a ti.

KNU-ဒူးပလာယာခရိုင် ih CDM tuahtu Sayama pawl lakah hnaṭuan dang ṭuantu khal an um nan kan ram boruak thawn tudinhmun ah Thiamtah a remcangbik ruangah Thiamtah an zir deuh thaw thluh.

“A thiam zo pawl cun internet cahmai ah thehlarnak khal an tuah thlang. Online ihsi order khal an cohlang ih remcang theidan ngaihtuah in kan bawmawton” tiah khuami cun a sim bet hrih. (KTM)

(Zuk remcang hman menmi a si)

Leave a Reply

Your email address will not be published. Required fields are marked *