Po Thaw siatton thu ah MMA community Annka

Bomb puak hliam thawn ralkap Siizung ih um MMA fighter Po Thaw cu atu ih a tuar mi harsatnak pawl tuarfei zetin a pahtlang thei ding zum a um thu MMA fighter Bozhena Antoniyar in a rel ih “MMA community in kan lo dinpi/tuarpi” a ti.

Amah cun “ralkap Siizung ah tuamhlawm in a um ti`n thuthang ka dong. A nunnak hrang tiang phan sak ding a um lo tiah ka thei ih lungawi um zet. Dam lohli dingin thla ka cam sak. Amah hi mituarfei zet a si” a ti.

Po Thaw cu May 5, Yangon ramṭhen, Natmauk ziin ih Team PT fitness center bomb puak ah hliamhma nazet tuar in Siizung ih tuamhlawm a si lai ah SAC ralkap pawl in an kai mi a si.

Loikaw ih ṭhanglian, Myanmar National Boxing Champion voi 2 rak sidahtu Bozhena Antoniyar cun “hivek dinhmun a thleng ding ti ka rak ruat ban lo ih thin khal a nuam lo zet. In ṭulbik caan ah a kiang ka um thei lo hi poi ka ti zet. Mipi lam khalin nasaten thlacam sak uh. Po Thaw khal lungsia thinnau loten ṭangṭenṭo seh tiah ka sim duh. Dothlennak a tawp tikah kan tongaw leh ding” a ti.

Po Thaw cu leitlunhuap MMA pawlkom tumbik 5 lakih telbanve ONE Championship ah fighter dinhmun ih rak telbanve a si ih Kawlram sung khalah MMA fighter dinhmun in hminthang a si.

Po Thaw siatton thu ah leitlunhuap hminthang MMA arsi Aung La Nsang khalin poi a ti thu le a rak tuarpi ve thu instagram ah a tarlang ih “miṭha lungtluang a si. Mina hrang thi hlut khal a teima zet. Mithleidang neiloin mibawm ringringtu a si” a ti.

 

View this post on Instagram

 

A post shared by Aung La Nsang (@aunglansang)

Po Thaw siatton thu ah SAC ralkap cun hitin thuthang an suah

Dagon University ih Tlawng ṭheh suak, Yangon khuami Po Thaw siatton thu ah bomb puaknak naivai ih um a rual le pawl simmi le ralkap thusuahmi a bangaw lo.

Ralkap lam cun “bomb a tuah tum lai ah cangsual in a puak ih a kut le taksa dangdang ah hliam a tuar” tiah an phuang.

North Okkalapa Siizung ih an tuamhlawm lai ah SAC ralkap in an kai ih nunau pakhat telin Siizung thlentu mipathum khal an kai cih.

Ralkap lam cun Siizung ih an phurnak mawṭaw ah kut ih tuahcawp bomb an hmu thu, Team PT fitness center sung khalah pistol, cerek le puakkuai thei thil tuahnak bungrua an hmu thu, thuthang an suah ih hivek cangvaihnak neitu cu Daan vekin kaihkhih thuṭhensak an si ding tiah an phuang.

Thu felfai theitu` Annka

Po Thaw rualṭha hminthup mipakhat cun “an that tummi a si. Dothlen cangvaihnak ah langhngan rorin a tel ringring. MMA fighter a si vekin thahrum zawngin siseh sualaw khal a thiam ih ‘nan ngam ceng a si le thirkulh sungah kan sualaw ding’ ti`n duhphorh cangvaihnak nei in ralkap pawl a rak ngiar hai.”

“Hminthang le mino pawl ih rinsanmi a si ruangah tuvekin an phiar mi a si. Bulpak lole hmaton in olten kan kai theiloding ti an thei ruangah May 5 ah bomb thawn an puah that tum.”

“Bomb an puah hlan minute 15 hrawngah Utopia Tower kiangkap hrawngah hnupuai pangai hruk ralkap tamzet an thleng. Palik ṭhenkhat khal an um ih Team PT fitness center sungah zo pawl an um tikhal an zingzoi.”

“Hnipuan pangai hruk ralkap milai pawl an tlan hnu reilote ah bomb a puak. Voi 3 a puak ih Po Thaw cu a nunnak hrang tiang phan sak umding khawpin hliam nazet a tuar. Cuhnu ah Siizung lam ah an panpi cih” a ti.

SAC ralkap cun ramsung mihminthang tamzet cu thubuai tuah sakin kaihkhih dingin an hawl ringring.

Hminthannak hmangin thudiklo theh darh ti`n siseh, raltho dingin mipi ṭhangphawktum tikhalin siseh, Daanlo ih dinmi NUG le CRPH thapek peihtlaihnak nei ti`n siseh thuphunphun suah in Myanmar ramsung hminthang tamzet le Dothlen cangvaihnak ih Langsar deuh pawl cu kai tum in SAC ralkap in an hawl ringring a si.

Leave a Reply

Your email address will not be published. Required fields are marked *