PM Hun Sen in Min Aung Hlaing cozah cu “Caw” thawn a tahṭhim

Hruaitu dinhmun in atufang ASEAN pawlkom kaihruaitu Cambodia PM Hun Sen cun Myanmar ukhruainak latu SAC ralhraang cu “Caw” thawn a tahṭhim ih “Caw a feh lo cun a hnukmi ‘Leng’ amahten a feh thei lo” a ti.

Kawlram remdaihnak hrang ASEAN khawkhanmi thlunduhlotu SAC ralhraang par ah a beidong zo thu a rel mi a si ih, PM Hun Sen cun February 16 ih ramsung Lilawn thar onpuai caan a hmang ṭum ah a relsuak mi a si tiah Cambodia hrambun RFA zungṭhen pakhat in a tarlang.

Cambodia PM Hun Sen cu Min Aung Hlaing in Kawlram ukhruai thuneihnak a la hnu, ramdang hruaitu pakhat dinhmun in SAC ralhraang tong hmasabiktu a si ih, Min Aung Hlaing thawn an tongaw ṭum ah ramsung remdaihnak hrang hmalaknak nei dingin le ASEAN thusuah thlun dingin SAC ralhraang hnen ah forhfialnak a nei.

PM Hun Sen cun ASEAN thusuah thlun dingin Min Aung Hlaing in i tiamkam tiah a rak rel dah nan, thla 1 pumhlum rei hnu khalah ramsung thlengdanglam awknak zianghman hmuh ding a um lo ruangah SAC ralhraang par ah a beidong zo thu a rel ih “SAC in thlengdanglamawk a tum lo cun midang khalin ngaih sak nak ding san a um hran lo” a ti.

Hitiih, Cambodia PM Hun Sen in SAC cozah par ih a hmuh dan a thleng nak san cu amah thinlungtak siloin ASEAN sungtel hruaitu pawl ih nor nak ruangah a si thei tiah kan ram boruak thlirtu mithiam ṭhenkhat cun an rel a si.

ASEAN sungtel rampi hruaitu tamsawn duhdan vekin SAC ralhraang cu ASEAN meeting kai khap an si ih, February 16 ih ASEAN hruaitu meeting khalah MAH le a milai pawl an sawm tel lo tiah theih a si.

Cambodia PM Hun Sen in Ralhraangbawi Min Aung Hlaing a phat san

Siarbet : Cambodia PM Hun Sen in Ralhraangbawi Min Aung Hlaing a phat san

Tuṭum, ASEAN hruaitu a simi Combodia ram cun January thla sung ih a ṭhulh zo mi annual ASEAN foreign ministers meeting cu Feb 16-17 ah tuah dingin a nemhnget.

Cuih meeting ah Cambodia Prime Minister Hun Sen cun SAC ralhraang a sawm tel tum lo tiah sunglam thuthang dongtu rintlak kyodonews cun a tarlang.

SAC ralhraang in ramsung a hraang zawng cangvaihnak a ti tawp cuanglo ruangah hitin thuthluknak a tuah ti a si ih, “ramsung remdaihnak hrang hmalaknak malte tal a um lo cun SAC ralhraang ai ah ramkhelnak thawn pehpar lotu sawm an si ding” tiah an tarlang.

PM Hun Sen thawn naivaitu miṭhenkhat cun SAC ralhraang in ASEAN thusuah a thlun lo ruangah meeting sawm tum lo mi sivekin an rel nan, Combodai ramsung buainak ruangih soiselnak a tam ruangah siseh, Indonesia le Malaysia hruaitu pawl in SAC ralhraang sawmtel an duh lo ruangah PM Hun Sen cun a hnaṭuanpi mithmai zohin le Leitlun mipi mithmai ngah duh ah hivekin thuthluknak a tuahmi a si tiah mithaim pawl cun an rel.

SAC ralhraang hin hnon a tuar nak ASEAN pawlkom ah lut kir saal thei dingin PM Hun Sen cu karbak ah a hmang tum.

Kawlram tlawng dingin SAC ralhraang in a hranten a sawm ih Min Aung Hlaing thawn sangkakhar meeting nak tiang an rak nei dah.

Asinan, atu ah, leitlun mipi mithmai zohin le a hnaṭuanpi pawl nornak zaar ah PM Hun Sen cun annual ASEAN foreign ministers meeting ah SAC ralhraang a sawm tel lo tiah theih a si.

Unau ah Kaiaw dingin Ralhraangbawi Min Aung Hlaing in PM Hun Sen hnen ah dilngen

Siarbet : Unau ah Kaiaw dingin Ralhraangbawi Min Aung Hlaing in PM Hun Sen hnen ah dilngen

Cambodia Prime Minister Hun Sen cu SAC ralhraang sawmnak thawngin January 7 ah Kawlram ah a ra tlawng.

Ni 2 caam dingin a ra ih, Naypyidaw a thlen hnu, Min Aung Hlaing thawn hmaton thureltlangnak an nei lai ah ralhraangbawi Min Aung Hlaing cun unua ah kaiaw dingin PM Hun Sen hnen ah a dilngen.

Cuih thu cu amah Hun Sen rori`n Cambodia hrambun Fresh News hnen ah a sim ih “senior general Min Aung Hlaing in a Godbrother dingih in dilngen cu ka tha tho zet” tiah a ti.

Cambodia PM Hun Sen cun “innsang tongawkhawmnak lole Ṭhitawknak puaipi tivek a um tikah khuallian dinhmun in sawm tengteng a beisei” tiah a rel bet a si.

Cambodia PM Hun Sen le ralhraangbawi Min Aung Hlang tongawknak cu leitlunhuap rampicang le human rights thawn pehpar ih hnaṭuan pawl in nasaten an soisel ih, ASEAN Human rights ṭuanvo neitu tla cun an pahnih hrang hlawk nak hrangah an tongaw mi a si ti`n an soisel ve a si.

Leave a Reply

Your email address will not be published. Required fields are marked *