Phyo Zeya Thaw thawn pehparin Ralhraang ralkap in Dalan hnen ah lungawi thu sim

Phyo Zeya Thaw le Ko Jimmy telin ralhraang ralkap in Dothlengnak thawn pehpartu mi 4 an that ih, mipi tuarna lungkuai in mitthli thawn an khawsa lai ah Phyo Zeya Thaw thawn pehparmi thuthang cu ralhraang ralkap Tv channel MWD ah minute 17 sung rori an phuang.

Thih daan tatmi mi 4 an that thu cu July 25 zing ah an phuang zo nan, sun hnu ah a hranten Phyo Zeya Thaw thawn pehparmi thuthang saupi an phuang ih “kaih suak thei dingih in ṭanpitu mipi le thu cipciar in sim thantu par ah kan lung awi ngaingai” ti`n MWD ah thuthang an phuang sal.

NLD PM hlun Phyo Zeya Thaw cu kan dung kum 2021, November 18 ah a umnak Yangon, Dagon Seikkan Township ah ralhraang ralkap pawl in an kai ih, a umnak cekci an thei suak dan cu felfaiin theih a si lo.

An kaipek ah a kut sung ih um meithal hmangtu mipi ralkap an kai ngah ih, amah phuang nak thawngin Phyo Zeya Thaw umnak an thei suak tiah thuthang a suak nan, tuni ih ralhraang ralkap thu phuan dan ah Dalan thupeknak ruangah kai ngah mi sawn si in thuthang an suah.

Ralhraang ralkap lam cun “kaihkhih a si hnu ah amah phuangnak thawngin rampi tibuaitu misual 293 le, an kut sung in meithal ralthuam tampi kaih cih a si ih, Phyo Zeya Thaw kai thei dingin inṭanpitu vengsung mipi le thuthup in simtu pawl par ah kan lung awi ngaingai ih, an mah bawmnak um lo seh la a cang thei lo ding” ti`n thuthang an phuang tel.

Siarbet : SAC ralhraang in Phyo ZeYa Thaw sual an puh mi pawl cu a rapthlak tuk (November 24, 2021 ih ngan mi a si)

Awnmawi khawvel ihsin ramkhelnak lam ih pumpeawtu NLD palai hlun Phyo ZeYa Taw kaihkhih a si hnu ah a kaitu ralhraang ralkap cun amah thawn pehpar mi tiih tarlangmi ramsung thubuai a um mi hmuahhmuah an pholang.

Yangon khawsung ih kahthatawknak telin veng lal, USDP party sungtel le Dalan tiih puhmi kahthatawnak voi 15 a um mi cu Phyo Ze Ya Taw ih meithal tawlrel sakmi thawn an cangvai tiah ralhraang ralkap cun an puh ih “an that dingmi le cangvaih dan ding thawn milawin meithal hriamhrei pawl a suahsak” tiah thu an suah.

Cumicu, amah Phyo Ze Ya Thaw phuannak thawngin kan theisuak a si tiah Ralhraang ralkap in thu an suah ih “2021 May thlalai hrawng ih Lanmadaw Township veng lal kapthatu Special Task Force – STF cu Phyo Ze Ya Thaw in meithal a pek hai” tiah an tarlang.

Yangon khuasung cangvaihnak picang deuh pawl cu Phyo Ze Ya Thaw hohami cangvaihnak sivekin tarlang thluh a si ih “2021 November thla thok khalah Mytel GM U Thine Aung kap that dingin YFA sungtel hnen ah meithal a pe. Cuih ṭum ih mithattu mi 4 pawl cu kan kai thei zo” tiah thusuahmi ah an ngan tel.

Cuihtlunah “Phyo ZeYa Thaw hriamhrei pekmi hmangin khuasung cangvaihnak a neitu mipa 34, numi 5 zatekom mipum 39 pawl cu hriamhrei fate 21, cerek thunnak bawm phunphun 50, 1465 cerek phunphun, bomb phunphun 57, meithalzian phut bawm 7, turbin 1 le drone 1 pawl thawn kan kai cih ih, kaih ngah hrihlomi pawl khal an keneh zawtin kan kai vivo ding” tiah 2021 kum cem thusuah ah an tarlang tel.

Siarbet : Thih daan tat 100 lenglo um mi sung in mi 4 an that

Myanmar rampi a buai hnu, ralhraang ralkap thih daan tat mi mipum 100 lenglo an um mi sung in mi 4 pawl cu ralhraang ralkap in an that zo thu, July 25 ah thuthang an suah.

Ralhraang ralkap thahmi mi 4 pawl cu Dothlengnak thawn pehpartu tiih puhmi Phyo Zeya Thaw, kum 41, Kyaw Min Yu, kum 53, Hla Myo Aung le Aung Thura Zaw tipawl an si.

An thah dan le tikcucaan cu felfaiin tarlang a si lo nan ramsung Hram ṭhenkhat cun July 23 zinglam ah Insein Thawnginn ah an thlai that tiah an rel.

An zaten thih daan an tat nak cu a rei phah thlang nan an that ding thu cu sungkhat naivai an theihter lo ih, thuthang a suak hnu ah ruak lak an dil nan ralhraang ralkap lam in an pe tum lo.

Ram buainak ruangih thih daan tat awk thu ah human rights pawlkom in siseh leitlun rampicang hruaitu pawl in nasaten an dem nan, ralhraang ralkap lam in hnaset tun in hmalaknak an nei thotho ruangah soisel demawknak a tam zet.

Kawlram cozah thahawkdan cu hridai thawn thlai that an si tlangpi ih, tu dinhmun ah Kawlram a buai hnu thih daan tat mipum 113 an um.

Leave a Reply

Your email address will not be published. Required fields are marked *