Phyo Zeya Thaw le Ko Jimmy hrang phuba lak dingin timlam

Phyo Zeya Thaw le Ko Jimmy telin ralhraang ralkap thatmi mi 4 pawl hrangah phuba lak dingin Yangon khawsung mipi ralkap pawl timlamnak an nei thu le tuni ihsin thok, catbang loin cangvaihnak an nei tum thu, mipi ralkap AC Ranger in khawtlang mipi a theihter.

Cuhleiah ralhraang thuṭhenzung ih thuṭhentu siseh, Thawnginn ih ṭuanvonei hmin cazin le an umnak hmun pawl cu khawsung ih cangvaitu mipi ralkap lole ACPLF Ranger hnen ah a thupten kuat dingin mipi an theihter cih.

“Hitiih thu kan suah nak san cu Ko Jimmy le Phyo Zeya Thaw telin Dothlengnak thawn pehpartu mi 4 pawl, ralhraang ralkap in an that mi cu mipi ral tho dingin in ngair ti`n kan hmu.”

“Curuangah an tuah mi vekin an tuar ding. Khawsung mipi ralkap pawl kutzakai tlangin tuni ihsin thok, cangvaihnak kan nei dingih catbang loin ralhraang ralkap le an mah thawn pehpartu hmuahhmuah thu ṭhen sak an si ding” tiah AC Ranger ṭuanvonei mipakhat in tualsung media hnen a sim.

Mipi ralkap pawl in thuthluknak an tuah zo bangin cangvaihnak a um tikah mipi lam fimkhur thiam a ṭul zet. Cangvaihnak olsam dingin le mipi him thei nak diangah Lamzinpi tivek ah suak tuk lo ding. Thil awn ring deuh a um khalle thu duh in bih ciamco lo ding, ralhraang ralkap naivai ah tlangleng lo ding ti`n amahcun a rel bet hrih.

Siarbet : Ralhraang ralkap Thih daan tatmi mipum 100 lenglo um mi sung in mi 4 an that

Myanmar rampi a buai hnu, ralhraang ralkap thih daan tat mi mipum 100 lenglo an um mi sung in mi 4 pawl cu ralhraang ralkap in an that zo thu, July 25 ah thuthang an suah.

Ralhraang ralkap thahmi mi 4 pawl cu Dothlengnak thawn pehpartu tiih puhmi Phyo Zeya Thaw, kum 41, Kyaw Min Yu, kum 53, Hla Myo Aung le Aung Thura Zaw tipawl an si.

An thah dan le tikcucaan cu felfaiin tarlang a si lo nan ramsung Hram ṭhenkhat cun July 23 zinglam ah Insein Thawnginn ah an thlai that tiah an rel.

An zaten thih daan an tat nak cu a rei phah thlang nan an that ding thu cu sungkhat naivai an theihter lo ih, thuthang a suak hnu ah ruak lak an dil nan ralhraang ralkap lam in an pe tum lo.

Ram buainak ruangih thih daan tat awk thu ah human rights pawlkom in siseh leitlun rampicang hruaitu pawl in nasaten an dem nan, ralhraang ralkap lam in hnaset tun in hmalaknak an nei thotho ruangah soisel demawknak a tam zet.

Kawlram cozah thahawkdan cu hridai thawn thlai that an si tlangpi ih, tu dinhmun ah Kawlram a buai hnu thih daan tat mipum 113 an um.

Leave a Reply

Your email address will not be published. Required fields are marked *