Phekone pengṭhen Mongpai ih Doawknak maksak + Video umsun 5

Thlanglam Shanram, Phekone myo, Mongpai palik sakhaan cu PDF – Mongpai (မိုးဗြဲ) le Shanram hrambun tlangpar hriamkeng pawlkom kopaw in May 23 ah an siim ih caantawkmawi kahawknak a suak hnu ah mipi humtu ralkap in nehnak an co.

Cumi doawknak maksak video tawi cu online ah a darh ih a zohtu le darhsawngsintu khal an tamzet.

Atlun ih video hi a rapthlak deuh ruangah direct in Youtube ah na zoh theilo men thei. Original na zoh duh le hinah hmet …. Mongpai Doawknak

May 23, Zinglam nazi 9 hrawngin an kapaw thok ih doawknak ah palikbawi pakhat le rank niam palik 3 telin SAC ralhraang lamṭang minung 14 an thi tiah PDF – Mongpai ṭuanvonei mipakhat in RFA hnen ah a sim.

Amahcun “Sakhaan pumhlum in nazi 1:30 hrawngah kan lak suak. Nazi pakhat hrawngah an dinhmun ṭhalozia theiaw in mipahnih cu kan kut ah an apaw. Sakhaan sungih um meithal thlak duhlo palik le ralhraang 15 hrawng cun an thih cilh. Palikzung cu kan urkang ih kan kut ih um palik pahnih cu himdam in kan kol hrih” a ti.

Doawknak ah SAC ralhraang lamṭang mithi an um vekin PDF lam khalah leiphum bomb pal ngah ruangah le meithal hriamtuar 4 an um ih mipakhat nunnak a liam ve.

Doawknak ah tatyin 422 ralhraang in meithaltum hmangin an kap bawm nan mipi lam ah hriamtuar le khawngaw an um tuk lo.

Asancu, May 23 zinglam nazi 8 hnu ah khuami pawl leng suak lo dingin PDF lam ṭuanvoneitu pawl in May 22 ah mipi ralrin an pek cia ruangah a si.

“Khuami ṭhenkhat cu Inn le Lo suahsan in hmunhim ah beunak an hawl cia. Atu dinhmun ah SAC ralhraang in meithal an kap nasatuk ruangah atang umsun khuami ṭhenkhat cu leng ah an suak ngam lo. Nan, tuahcun khualam hoih in meithal tum an kap nasa ruangah inn ih um men khalle a him nawn lo” tiah Khaumi pakhat in a ti.

Tudinhmun ah Shanram Phekone Township telin Kayah ramkulh khua ṭhenkhat pawl ah bomb puak siseh, doawknak a um phahphah ruangah hramlak ih beunak hawltu mipi 5000 kim zik an um thlang.

Cumi thuthawn pehparin May 23 ih ongtharmi raltlan buuk ih ṭuanvonei mipakhat cun “khua tamzet ah bomb puak thawm, meithal puak thawm thangin doawknak a um tikah Inn le Lo suahsantu mipi 5000 kim zik an um thlang ding.”

“Abikin Loikaw pengṭhen, Demoso pengṭhen le Phekone pengṭhen ih umtu raltlan an tambik. Raltlan an tam vivo tikah caan rei hrang hramlak ih um ding a rem thiam lo. Curuangah May 23 in raltlan buuk thar kan din ih umhmun kan khuarnak kiangkap ih um raltlan ṭhenkhat cu kan hnen ih um dingin kan sawm thok.”

“Cuvek dinhmun kan si ruangah raltlan buuk kiangkap ah doawknak tuah lo dingin dilngennak kan nei” a ti.

Mongpai thawn ramri a simi Kayah ramkulh khua ṭhenkhat ah kan dung zarh lam khalah PDF le SAC ralhraang nasaten an kapaw ih Kayah ramkulh hrambun rakkapbu in bomnak a nei rero zo bangin hmailam khalah kopawkhawm in hmainor tum vivo a si ih hmailam tikcucaan khalah doawknak a um pehzom vivo ding zum a um.

Leave a Reply

Your email address will not be published. Required fields are marked *