SAC ralhraang in zinkong danglam hmangin mipi thinlung ciah neh tum

SAC ralhraang in mipi tlonnak le ASEAN telin Leitlun mipi mithmaiṭha co duh ah thawngtlak tawkmawi a thlah zalen hnu ah ramsung mipi mithmaiṭha cosin dingah le mipi lungput thleng danglam beisei in paisa coihnak thawn mipi an hiip tum.

Covid 19 boruak ruangih pursumlam tlaksia pawl tung ding saal dingah Covid 19 Fund (ရန်ပုံငွေ) sung ihsin a pung maltakte thawn mipi pawl paisa kan coih ding ti`n SAC ralhraang cun October 22 ah thu an suah.

Kum 1 hnu ah paisa pung zaṭek 1% thawn ruul saal dingin paisa coih dilnak form tivek tiang an suah thluh zo ih Yangon le ramkulh pengṭhen UMFCCI (ကုန်သည်များနှင့်စက်မှုလက်မှုလုပ်ငန်းရှင်များအသင်း) zung le cozah zung dangdang ah paisa coih dilnak ca lak a theih zo ti`n thuthannak ah an ngan tel.

Hitiih, voilekhat ah miṭhazet le mipi zawnruatzet vekih cangvaitu SAC ralhraang cu tumtahnak dang nei in an cangvaimi a si thei tiah kan ram boruak thlirtu le SAC ralhraang lungput theitu pawl in an rel.

“Nunrawng zetin mi an that rero lai ah mipi zawnruatzet vekin an cangvai cu mi hngir an ti ṭeu. Thinheng umtuk taakah hnih lamlam a suak. Atuih an ke kar tum dan cu nauhakte hman in an thei thiam ding.”

“Himihi mipi lainatnak lungput thawn an tuahmi a si lo. Saruh thawn Uico kan lem bangin ralhraang pawl in an par ih kan lungput pawl ti nem ding beisei in an tuah mi a si” tiah SAC ralhraang cangvaihdan thlirtu ramleng um mipakhat cun a rel.

SAC ralhraang cun paisa coih dilnak cu online khalih dil theih dingin an tawlrel ih, Ocotober 25 ihsin November 19 tianglawng dil theih a si ti`n thu an than.

Leave a Reply

Your email address will not be published. Required fields are marked *