Palik le SAC ralhraang sunglamthu puut darh.

SAC ralhraang ukhruainak hnuai ih hnaṭuan bansantu, CDM ih telve palik ṭhenkhat cun hnaṭuan an ban naksan le palik sung thu pholang in atufang SAC ralhraang kut hnuai ih hnaṭuantu palik pawl an mual phoh.

CDM ih telvetu Paliktlan pakhat cun “Nunnak thaap in mipi hrang hnaṭuan dingin tiamkamnak kan nei. Asinan atuih SAC ralhraang cangvaidan cu palik pakhat ih thlundingmi phungdaan thawn a kalhaw bepbep”.

“Cuihtlunah atufang rampihuap doawknak pawl kan zoh ciang tikah palik pawl cu SAC ralhraang ih hmanfung pakhat men an si zia le bulpak him thei nak ding hrangah cerek khamtu, an aiawh ih thituding men ah an hmang timi kan hmu thei” a ti.

Paliktlan pakhat khalin “Rakhine ram ih ka duty lai ah ralkap pawl ih hmanlakmi ka rak si ve. Palik 4-5 hrawng lawng kan si hlei ah meithal puak thei fangfang kan hmang. AA ralkap thawn tongawding kan si ih in ra siim hai bang sehla thih lo baak ziin dang zawh ding a um lo.”

“May 23 ih Shan ram le Kayah ramri doawknak kan zoh tik khalah SAC ralhraang lam ih mithi tamsawn cu raldonak ih hmanṭangkai tuk lomi shotgun meithal kaitu(မီးကျိုးမောင်းပျက်သေနတ်) palik pawl an si. Tu ih an hman reromi khal ralkap pawl ih hman duh lo mi sanmanlo meithal an si”.

“Ralkap hmunram thianfai an duh khalle palik bawmnak an dil. An kenmi meithaltum cu Palik sakhaan ah ṭhum in mi an kap. Asinan, Doletsal kan tong tikih tuarbiktu cu palik thotho an si. Mi kan mal hlei ah kan ralthuam le hman an tlak lo” a ti.

Rampi boruak thlirtu le CDM teltu paliktlan pawl ih sim dan ah မြို့နယ်, ခရိုင် uktuding khalah anmah palik sungta khaisomi hmuhding an um hruthralo ti a si.

Palikbawi ṭuanphu an tamtuk nan hnathar peknak a um tikah ralkap lamlam palikbawi an ṭuanter. Cumicu ralkap duhdan ih hnaṭuan thei dingin le hriamhreikai ralkapbu lole mipi humtu thawn kahdonak a suak tikah palik rank niam pawl thihmaisabik dingih fial theitu an beisei ruangah a si tiah an sim.

“Veng sung ah mahte tuah theih mi Tawh bohṭul tivekmen a um khalah palik kotahrat in an boh fial. Mipi thawn tongaw tik khalah tuahlo theihloin palik hmai an nor ter” tiah Paliktlan cun a sim hrih.

Min Aung Hlaing hohami Kawl ralkap in February 1 ih rampi ukhruai thuneihnak an la hnu ah rampumhuap mithi 1000 kimzik an um thlang. Cumicu SAC ralhraang kuthnuai ih hnaṭuan Palik pawl ih tuahmi/thatmi bang dingin SAC ralhraang an cangvai mi a si tiah CDM ih teltu Paliktlan pawl cun an ti.

“Atak ahcun lamzawhtu mipi ṭhenṭhek tikah ralrinpek hnu ah caan tawkmai hngaktading hi palik hnaṭuan a si. Ralrinpek veten kah cih ding a si hrimhrim lo. Nan, ralkap pawl cun hmaisabik ah palik an dingter ih dunglam in an kap thok. Rampumhuap mithi tamsawn cu mihrokhrawl SAC ralhraang pawl ih that mi an si ih mipi hmai ah palik hmai bal dingin dunglamin hna an ṭuan mi a si” tiah Tamwe khuami paliktlan pakhat cun a ti.

Tukhalah Kawlram palik cu SAC ralhraang ih hnaṭuanpekmi Ministry of Home Affairs kaihruaitu ralbawi kuthnuai ah an ret ih Palik kaihruaitu cu ဒုတိယဗိုလ်ချုပ်ကြီးသန်းလှိုင် a si.

Leave a Reply

Your email address will not be published. Required fields are marked *