Nunrawng Kawl ralkap cetcangdan thu ah President Joe Biden ṭongsuak

Kan kawlram buainak cu leitlun huap ramtin deuh thaw in an thei thulh thlang ih ram tamsawn cun kawl ralkap hraang pawl ih cetcangdan hi nasa zetin an soisel.

March 27 ih mipi 100 luan an kah that mi thu khal ram tamzet ih thuthang cahmai rori ah tarlang a si ih online ih an thehdarh mi khal hmuh ding a tam zet.

March 28 ah US president Joe Biden cun kawl ralkap hraang pawl in a mah ram mipi a thatvaat dan cu a rapthalk tuk rori tiah a relsuak.

Joe Biden cun Vanzam tualrawn ih thusutnak an nei mi ah “a rapthalk tuk rori. Myanmar ramsung ih thilthleng cu a besia tuk. Zangfah lainatnak nei lo in an cangvai. Thuthang kan dong vek a si le hrial theih cingin mitamzet that an tuar zo” a ti.

US ram hin Kawl ralkap sualral, mipi kah that ding ih thupetu tiih a theih mi le ralkap unit zawng khalin pursumlam hremnak a pe rero hai zo.

Myanmar ram hrang hmalaknak an nei rero mi thuthawn pehpar in thusutnak an nei tikah “tuah ṭul kan timi hmuahhmuah cu kan tuah rero lai ih hmalaknak kan nei rero lai” tiah US President Joe Biden in a ti.

Kawl ralkap pawl in Myanmar kumpi cozah thuneihnak an la hnu February 1 ihsin tuini March 29 tiangah ralkap le palik pawl ih kah that mi mipi 500 an kim zik a si.

Leave a Reply

Your email address will not be published. Required fields are marked *