Numi pakhat ruangah Chin mi kan hmin sia

Kalay Quarantine lut lakih telvetu numi pakhat cun Covid 19 Kalay Volunteer le rawl cungcang ah ṭongkam mawilo zetin thangsiatnak Ca a ngan ih Kalay thuthang Facebook group pakhat ah a thlah.

Cuih post cu Kalay Volunteer pawl in an hmu leh sal tikah an riah a sia zet. A si lo mi in puh ti`n mipi hnen ah theih ter nak ca an tar mi rak siar ve aw.

“Covid 19 nathrik karhzailo dingin ramleng in ratlungtu Quarantine an retnak thla 6 a kim cuahco thlang ih, Quaraintine luttu mipum 1700 luan pawl cu zing, sun, zaan in a lak in rawl do an si.

Athok ahcun Quaraintine lut pawl hrang rawl hlutu an tam tuk ruangah time table tuah in a sangsang ten an hlu.

Rawl voikhat hlu ah paisa Ting luan an cem ṭheu ih, ni a hung rei vivo tikah a hlutu an mal vivo. Nan, a caancaan ih hlu cu an um phahphah. Quaraintine rak lut dahtu mipum 3000 hrawng lak ihsin minung 7 nih an lut laiih an enkol ṭhatzia theihhngilh loin rawl an hlu phahphah.

Tu ni tiang Quaraintine lut thar an um ringring lai ih rawl hlutu an um nawnlo tluk a si ruangah volunteer pawl in remcang thei bikin an ngaihtuah ṭenṭo.

Aleng ah rawl voikhat ei man 1500 kyat a si nan “သီရိဝေ´´ rawl dawr te in khawtlang mipi bawm phah nakah ti`n rawl cu voikhat ei 1000 kyat ah ṭhum in an suang sak.

Cukhalcu khawsung ihsin rawl phur nak motor man pawl an mah in an kuan ṭheh hlei ah Quaraintine luttu pawl ka thaw dingin ceṭani le hmeh ṭukṭak an tuahsak ringring.

Kalay ih CBFQ dinhmun in cu Quaraintine lut pawl hrangah a cang thei tawk in rawl ngaihtuah sak ringring an si.

Titheitawk suah ih kan ṭuan rero mi cu numi pakhat in Facebook ah thangsiat zawng in ca a thlah ih “rawl uih in pek. Cukhalcu voikhat hnih men si lo in nitin rorin in pek. A lak in kan ei mi a si lo. mahte paisa suah in kan lei mi a si. Uico le rannung bang men kan si lo” a ti.

Cumi thu ah, hih hmun ih ummi ka si vekin a sim mi a dik lo zia thei ciang biktu ka si.

Hivekin thubuai malte a um ruangah Quaraintine luttu hmuahhmuah le ca post tu ko khawm in thusutnak kan nei.

“rawl nan ei mi a uih maw si” ti`n kan sutaw hai tikah an mah lo bak cun “kan thei lo” in ti. an nih cun a caancaan ih thil cang thei mi si ko tin an ruat thiam men. hih thuhla ah kan sim fiangawk theizo ih thil ziang kim a ṭha thluh zo.

Asinan, သီရိဝေ rawl dawr neitu cu ning hang in a ṭap rori. “kan nih in hmuah zangfah thinlung nei in kan tuah sak ih an nih in hivek in thangsiatnak ca an ngan” a ti.

Covid 19 raldo ding ahcun mi pakhat lawng cangvaih theih mi a si lo. volunteer, Quaraintine luttu, a hlutu pawl thawn rualrem le rawnawton ih ṭuantlang ding sawn a si. Tudinhmun ah mipakhat in a tuar a si le khaw pumpin tuar vek a si ruangah lungrual takin kan pahtlang ṭul a si.
KaLungAwi
M.n.soe
Kalay Volunteer

Leave a Reply

Your email address will not be published. Required fields are marked *