Nui` pumsung ih naute hmuta man loin Dalan ruangah Pacangno pakhat mual liam

Mandalay, Bagan Myothit ih um pacangno Ko Moe Myint Aung cu Dalan pawl ruangah May 30, zinglam nazi 1 hrawng ah SAC ralhraang in an kap that tiah kan thei.

Vengsung mino pawl in meithal hriamhrei an kol tiah Dalan pawl ih simtheinak vekin SAC ralhraang cun zaanṭim ah vengsung an siim ih mipakhat nunnak liam in mino 5 kiahkhih an tuar tiah khuami pawl in an sim.

“Dalan pawl in thuthang diklo an theh darh ruangah vengsung siim kan tuar. Mino pawl in meithal an kol tiah thuthang an theh darh ih SAC ralhraang cun mino pawl an vuakvelh hnu ah miparuk an kai.”

“Ko Moe Myint Aung khal an kai tel nan a pum ih meithal hriam tuarloin a nunnak a cem. An mah hi miṭha zet an si nan hivek dinhmun an thleng cu riahsia za a si. An nu le nau pai lai a si tikah ruah an har zet” tiah khuami mipakhat in a ti.

Kum 27 mi Ko Moe Myint Aung ruak cu a sungte hnen ah thleng fel in 31/5/2021 zinglam nazi 10 ah an vui tum tiah theih a si.

Min Aung Hlaing hohami SAC ralhraang hin February 1 ihsin tuini May 30 tiangah minung 800 luan an that zo ih kaihkhihmi 5000 luan an nei zo a si.

Leave a Reply

Your email address will not be published. Required fields are marked *