NUG ih ramkheldan Dot khat in a ṭhang

ASEAN hruaitu ṭhenkhat telin Leitlun boruak nikhua ti ṭhat thei dan ding thu thawn pehparmi voithumnak CSDRA (Climate Smart and Disaster Resilient ASEAN) online hmuhton thurelkhawmnak ah NUG cozah ihsin Natural Resources and Environmental Conservation Minister Dr. Tu Hkawng an sawm telve tiah sawm a simi Dr. Tu Hkawng tarlangnak thawng in theih a si.

November 23 ihsin 25 tiang tuah dingmi cuih meeting ah Ukhruaiawknak le Policy (Policy and Governance) thu rel dingah ASEAN hruaitu ṭhenkhat thawn sawm kan si ti`n Dr. Tu Hkawng cun social media ah a tarlang.

Dr. Tu Hkawng cun “Leilungpi a harh dam theinak dingah leitlun ramtintian ih ram uktu policy ah a ṭhum aw. Cuvek policy cu ralhraang cozah pawl ih sersuak theihmi a si lo.”

“February 1 ihsin ralhraang pawl in kan ram ukhruai thuneihnak an lak ih ramsung hnaṭuan tamzet an phit ruangah mipi cu harsa in khuate lam an pan ih nuntu khawsaknakding hrangah Lei sung suak thilri le hramlak thilsuak pawl an ring.”

“Cutikah kan leiram kan thingkung pawl a siat ih caan tawite sungah kan boruak nikhua tiang a khawng ban. Cumi hrial theih ding cun kan ram ah remdaihnak a thleng ṭul. Zalenram kan si lawngah mipi hrang ih thupibik hnaṭuan ding tampi a suak thei ding. Cumi lawngah Tuupi le leisungsuak thilri par ih kan ṭhumawknak a dem thei ding.”

“Cun, ASEAN ramsung ih Vur Tlang neitu cu kan mah Kawlram lawng kan si. ASEAN ram pawl ih RoHlu pakhat tikhalin kan ko thei. Cuvek thilmankhung pawl cu Ralhraangrual ruangih Sun a phu lo tiah thu rel ka tum” a ti.

Ramsung media ṭhenkhat tarlang mivek a si le Dr. Tu Hkawng hi Kawlram cozah aiawhtu dinhmun ih sawm mi ti a si ih, hivek thuhlapi relnak ah ASEAN ramhruaitu pawl lakih NUG palai an sawm telve cu cozah pakhat dinhmun vekih theihpitnak hrang zuam rerotu NUG cozah hrangah hmasawnnak tumzet pakhat a si.

Leave a Reply

Your email address will not be published. Required fields are marked *